Amerikaning Apple va Tesla kompaniyalari aksiyalari sarmoyadorlarning Xitoydan butlovchi qismlar yetkazib berish bilan bog‘liq muammolardan qo‘rqishi tufayli keskin tushib ketdi. Bu haqda BBC xabar berdi.
Xabar qilinishicha, Tesla aksiyalari narxi 109 dollargacha tushib ketgan, bu kompaniyaning 2021-yil noyabridagi rekord darajasidan 73 foizga kamaygan.
Apple aksiyalarining narxi 130 dollargacha tushib ketdi, bu 2021-yil iyunidan beri eng past darajadir.
Xitoy hukumatining COVID-19 ga nisbatan “nol bardoshlilik” siyosati va bir haftalik lokdaunlar tufayli kompaniyalar mamlakatda ishlab chiqarishni saqlab qolish uchun kurash olib bordi.
Ko‘pgina cheklovlar olib tashlanganidan so‘ng, ular o‘z korxonalarida ham kadrlar inqiroziga duch kelmoqda.
Dunyo bo‘ylab Markaziy banklar tomonidan foiz stavkalarining oshishi, global iqtisodiyotning sekinlashishi va Ukrainada davom etayotgan urush fonida investorlar ehtiyotkor bo‘lishi va yirik sarmoyalardan o‘zini tutishi kutilmoqda.
Izoh (0)