Hindistonning Assam shtatida leopardning hujumi oqibatida kamida 15 kishi jarohat oldi. Bu haqda Times of India xabar berdi.
Yaradorlar orasida o‘rmon xo‘jaligi xodimlari, bolalar va ayollar bor, ularning ko‘pchiligi leopardning tishlashi oqibatida jarohat olgan.
“Ular kasalxonaga yotqizilmoqda, sog‘lig‘i xavf ostida emas. Ammo Jorhat tibbiyot kolleji kasalxonasiga kelayotgan yaradorlar soni oshmoqda”, — deydi shifoxona matbuot kotibi Purnima Barua.
Yaradorlarning aksariyati shifoxonaga Jorxat shahri chekkasida joylashgan Yomg‘ir o‘rmonlari ilmiy-tadqiqot instituti kampusidan yetib kelgan. O‘rmon departamenti xodimlarining aytishicha, hayvon yaqin atrofdagi Gibbon yovvoyi tabiat qo‘riqxonasidan oziq-ovqat izlab kampusga bostirib kirgan.
Ta’kidlanishicha, leopard tunda choy plantatsiyalari bilan o‘ralgan institutga tutash qishloqlar aholisiga hujum qilgan.
“Hayvon juda agressiv edi. Uni qo‘lga olish uchun kampus ichida tuzoqlar o‘rnatdik. Leopardni qidirishga harakat qilmoqdamiz”, — deydi shahar matbuot kotibi. Aholiga uyda qolish tavsiya qilingan.
Izoh (0)