Faqat tuxum oqini talab qiladigan ko‘plab retseptlar mavjud. Ammo ortib qolgan sarig‘larni nima qilish kerak? “Noviy ochag” nashri ulardan qanday maqsadlarda foydalanish mumkinligi borasida maslahatlashdi.
Mayonez tayyorlash mumkin
Tuxum sarig‘i mayonezning asosiy tarkibiy qismlaridan biri bo‘lib, uni uy sharoitida osongina tayyorlash mumkin. Buning uchun 2 dona tuxum sarig‘i 1 osh qoshiq xantal, 0,5 osh qoshiq limon sharbati, 1/3 choy qoshiq shakar va 1/3 choy qoshiq tuz bilan aralashtiriladi. Mahsulotlar blender bilan aralashtirilib, asta-sekin 150 gramm o‘simlik yog‘i qo‘shiladi. Tayyor mayonez muzlatkichda uch kungacha saqlanishi mumkin.
Sousni quyuqlashtirish uchun
Agar sous juda suyuq bo‘lsa, unga bir nechta tuxum sarig‘i qo‘shiladi. Natijada sous tez orada qalin va yopishqoq holga keladi.
Puding va krem uchun
Tuxum sarig‘i suv miqdorining pastligi va yog‘ miqdorining yuqoriligi tufayli har qanday taomga quyuqlik beradi. Xususan, shirinliklar kremi quyuq bo‘lsa, ularning shaklini ushlab turishni ta’minlaydi.
Kotlet va teftel uchun
Ko‘pgina uy bekalari qiymaga butun tuxum qo‘shadi. Biroq tuxum oqi go‘shtni yumshoqlikdan mahrum qilishi mumkin. Sarig‘i aksincha barcha mahsulotlarni bir-biriga yopishtirishga qodir. Bunday kotletlarni grilda ham, pechda ham pishirish mumkin, chunki ular shaklini yo‘qotmaydi.
Sho‘rva tayyorlash uchun
Tuxum sarig‘i yordamida har qanday sho‘rvani mazali va chiroyli tarzda tayyorlash mumkin. Buning uchun 2 ta tuxum sarig‘i bir qoshiq smetana va ozgina limon sharbati bilan silliq bo‘lguncha aralashtiriladi. Sho‘rva tayyor bo‘lishi bilan ushbu aralashma qo‘shiladi va olovdan olinadi. Agar sho‘rva yana qaynashda davom etsa, taomning rangi o‘zgarishi mumkin.
Glazur tayyorlash uchun
Tuxum sarig‘ini shakar, vanil va sut (yoki qaymoq) qalin va yopishqoq bo‘lguncha aralashtiriladi. Tuxum sarig‘i turli xil pishiriqlarni bezash uchun ishlatilishi mumkin. Buning uchun u xamir yuzasiga surtiladi.
Yuz va soch uchun niqoblar
Tuxum sarig‘i ko‘plab foydali moddalarga boy, jumladan A va B vitaminlari, shuningdek, kalsiy va temir. Kosmetologiyada u namlovchi niqoblar uchun asos sifatida ishlatiladi. Tuxum sarig‘i yuzning terisiga yoki sochlarga surtiladi, so‘ngra toza suv bilan yuviladi. Qo‘shimcha mahsulotlar sifatida asal, limon va piyoz sharbati, qaymoq, smetana, efir moylari va aloe sharbati qo‘shish mumkin.
Izoh (0)