Hech kim uy tozalash uchun ko‘p vaqt sarflashni xohlamaydi. Harakatni tejash uchun uy xo‘jaligi bo‘yicha mutaxassislar va tajribali uy bekalarining maslahatlaridan foydalanish lozim. Ularning har birini bajarish uchun atigi bir necha daqiqa kerak bo‘ladi va uyni saranjomlik uzoq vaqt tark etmaydi, deb yozadi “Noviy ochag”.
Yotoqni tartibga keltirish
Uydan chiqishdan avval yoki uyg‘ongandan so‘ng darhol yotoq o‘rnini tartibga keltirish ishni ancha yengillashtiradi. Qolaversa, xonani tartibli ko‘rsatadi.
Hammomni muntazam yuvish
Dush qabul qilgandan so‘ng darhol xonani tozalash kerak. Bu bor-yo‘g‘i 20 soniya davom etadi, ammo keyinchalik tozalash qiyin bo‘lgan dog‘lar qolmaydi.
Rakovinani muntazam yuvish
Odatda rakovinadan tez-tez foydalanilgani uchun tish pastasi yoki boshqa dog‘lar paydo bo‘ladi. Kir u yerga chuqur o‘rnashmasidan oldin muntazam tozalash tavsiya etiladi.
Oshxona yuzalarini artib olish
Buning uchun uy sharoitida ham aralashma tayyorlash mumkin. Sirka, idish yuvish vositasi va oddiy suv metall yuzalarga yorqinlik beradi.
Tozalashni boshqa ishlar bilan bir vaqtda amalga oshirish
Masalan, oshxona tozalash uchun alohida vaqt ajratish shart emas. Shunchaki, ovqat yoki boshqa yegulikni pishirish davomida idishlarni yuvish, shkaf yoki muzlatkichni tartibga keltirish mumkin. Bu ko‘p vaqtni olmaydi va oshxona hamisha toza ko‘rinishni saqlab qoladi.
Uyquga yotishdan oldin changyutkichdan foydalanish
Uxlashdan oldin xonalarni changyutkichda tozalash uchun 7 daqiqa sarflash mumkin. Shuningdek, bu jarayon jismoniy harakat qilishga hamda xonalarni changdan xalos qilishga yordam beradi.
5 daqiqalik tozalashni bajarish
Qolaversa, uyquga ketishdan oldin butun oila a’zolar bilan birgalikda 5 daqiqalik tozalashni amalga oshirish mumkin. Bu uyni tez va oson tozalashga yordam beradi. Ayollar oshxonani, erkaklar mehmonxona va yo‘laklarni, bolalar esa o‘yinchoq va kitoblarni tartibga keltirishi mumkin.
Kiyimlarni hamisha shkafga qo‘yish
Aksariyat insonlar ishdan qaytgach kiyimlarni shkafga joylashtirishga erinadi. Natijada kiyimlar g‘ijimlanadi va joyida haftalab qolib ketadi. Uy tozalash vaqtida ushbu arzimas ish ham ko‘p vaqt talab etadi. Shuning uchun ularni muntazam ravishda shkafga joylashtirishga odatlanish kerak.
Deraza va eshiklarni ochish
Ertalab yoki havo yaxshi vaqtda deraza va eshiklarni ochish ham xonada havo aylanishini yaxshilaydi va kislorod bilan to‘yintiradi. Toza havodan nafas olish esa insonga tetiklik bag‘ishlaydi.
Izoh (0)