“Islohotlar natijasi birinchi navbatda mahallalarda ko‘rinishi lozim” — Tanzila Norboyeva

O‘zbekistonda islohotlar natijasi va samarasi ham birinchi navbatda aynan mahallalarda ko‘rinishi va his etilishi lozim. Bu haqda Tanzila Norboyeva Oliy Majlis Senatining o‘ttiz oltinchi yalpi majlisida aytib o‘tdi.

“Endi asosiy e’tiborni hududga, ayniqsa, mahallalarga qaratishimiz lozim. Chunki islohotlar birinchi navbatda mahallalarda amalga oshirilmoqda hamda uning natijasi va samarasi ham birinchi navbatda aynan mahallalarda ko‘rinishi va his etilishi lozim”,  — dedi Senat raisi.

Uning so‘zlariga ko‘ra, bu yo‘nalishdagi ishlar yanada samarali bo‘lishi uchun mahalliy kengashlarni faol jalb qilib, aholi bilan maslahatlashib hududdagi dolzarb masalalarni hukumat a’zolari oldida ko‘tarish va ularning yechimini topishga harakat qilish zarur.

Prezident Shavkat Mirziyoyev 20-dekabr kuni Oliy Majlisga murojaatnomasida xalq bilan muloqotning yangi bir shakli, ya’ni joylarda Hukumat kunini o‘tkazish yo‘lga qo‘yilishini ta’kidlab o‘tgandi.

“Har bir viloyatdagi muammolarni yechish uchun har oyda joyiga chiqqan holda Hukumat kuni o‘tkazilishi yo‘lga qo‘yiladi. Vazir har yil boshida jamoatchilik oldida sohadagi rejasi va yil yakuni bilan esa uning natijasi bo‘yicha hisobot beradi. Ta’kidlab aytmoqchiman, endi qaysi vazir o‘z ishini eplay olmasa, iste’foga chiqadi”, — degan edi davlat rahbari.

Tanzila Norboyeva bu amaliyot senatorlar uchun katta imkoniyat berishini qayd etdi.

“Aslini olganda, bu amaliyot senatorlarimiz uchun katta imkoniyat beradi. Bu jarayonda senatorlar kuzatuvchi emas, balki faol ishtirok etishlari, bunda hududdagi masalalarni ularning samarali yechimi bilan birga hukumat oldiga qo‘yishlari lozim”, — dedi Senat raisi.