Senatning bugun (27-dekabr) bo‘lib o‘tayotgan 36-yalpi majlisida 2023-yil uchun davlat budjetiga oid qonun ko‘rib chiqildi. Bu haqda “Daryo” muxbiri xabar bermoqda.
Qonunga ko‘ra, 2023-yilda O‘zbekiston iqtisodiyotida yalpi ichki mahsulotning o‘sish sur’atlari 5,3 foizni va iste’mol narxlari indeksi 2022-yilning dekabr oyiga nisbatan 9,5 foiz miqdorida bo‘lishidan kelib chiqib, davlat budjeti parametrlari hisob-kitob qilingan.
Moliya vaziri Timur Ishmetovning ma’lum qilishicha, konsolidatsiyalashgan budjet daromadlari 2023-yilda 310,7 trillion so‘mni hamda xarajatlar 343,2 trillion so‘mni tashkil etishi kutilmoqda.
“2023-yilgi davlat budjeti xarajatlari (davlat maqsadli jamg‘armalariga ajratiladigan transfertlar bilan birga) 257,7 trillion so‘mni, yalpi ichki mahsulotga nisbatan 24,1 foizni tashkil etishi kutilmoqda”, — dedi vazir.
Majlisda kelasi yili ta’lim sohasi xarajatlariga 58,4 trillion so‘m, sog‘liqni saqlash sohasi chiqimlariga 28,4 trillion so‘m ajratilayotgani aytildi. Shu bilan birga, madaniyat sohasiga 2,5 trillion so‘m, sportga 2,3 trillion so‘m, fanni rivojlantirish tadbirlariga 1,8 trillion so‘m yo‘naltirish belgilangan.
2023-yil uchun davlat budjetida aholini ijtimoiy himoya qilishning ustuvor yo‘nalishlarini moliyalashtirish uchun 18,1 trillion so‘m ajratiladi.
Kelgusi yilda jami 52 mingdan ortiq daromadi yuqori bo‘lmagan va uy-joy sharoitlarini yaxshilashga muhtoj fuqarolarga ipoteka krediti bo‘yicha dastlabki badal va foizlarning bir qismini qoplash uchun davlat budjeti mablag‘lari hisobidan 1,1 trillion so‘m subsidiyalar to‘lab berilishi ko‘zda tutilgan.
Qonun bilan 2023-yil uchun O‘zbekiston nomidan va respublika kafolati ostida tashqi qarzlarni jalb qilish bo‘yicha yillik imzolanadigan yangi bitimlarning cheklangan hajmi 4,5 milliard AQSH dollari miqdorida etib belgilanmoqda.
Muhokamalar yakunida qonun Senat a’zolari tomonidan ma’qullandi.
Izoh (0)