Janubiy Koreya hukumati havo chegarasi Shimoliy Koreya dronlari tomonidan buzilishi sababli qiruvchi samolyot va vertolyotlarini havoga ko‘tardi, havo mudofaa tizimlari ishga tushdi. Bu haqda Yonhap xabar berdi.
Koreya Qurolli kuchlari Shimoliy Koreya dronlari ekani taxmin qilinayotgan ko‘plab “noma’lum obyektlar”ni topdi. Uchuvchisiz uchoqlar soni haqida ma’lumot berilmagan. Dronlar ikki Koreyani ajratib turuvchi demarkatsiya chizig‘ini kesib o‘tgan. Dronlar bortida qurol borligi haqida ishonchli ma’lumot yo‘q.
Chegarani buzgan hududga qiruvchi va hujumchi vertolyotlar yuborilgan, ogohlantiruvchi o‘q otilgan. Harbiylar KA-1 yengil hujumchi samolyotini ham havoga ko‘targan, biroq noma’lum sababga ko‘ra, u Seuldan 140 kilometr sharqda joylashgan Xonson okrugida qulab tushgan.
“Har ikki uchuvchi ham eson-omon qochib qutulgan”, — deydi harbiylar.
Xavfsizlik nuqtayi nazaridan Janubiy Koreyaning Gimpo va Inchxondagi ikkita yirik aeroportida parvozlar bir soatga to‘xtatildi.
Izoh (0)