Жанубий Корея ҳукумати ҳаво чегараси Шимолий Корея дронлари томонидан бузилиши сабабли қирувчи самолёт ва вертолётларини ҳавога кўтарди, ҳаво мудофаа тизимлари ишга тушди. Бу ҳақда Yonhap хабар берди.
Корея Қуролли кучлари Шимолий Корея дронлари экани тахмин қилинаётган кўплаб «номаълум объектлар»ни топди. Учувчисиз учоқлар сони ҳақида маълумот берилмаган. Дронлар икки Кореяни ажратиб турувчи демаркация чизиғини кесиб ўтган. Дронлар бортида қурол борлиги ҳақида ишончли маълумот йўқ.
Чегарани бузган ҳудудга қирувчи ва ҳужумчи вертолётлар юборилган, огоҳлантирувчи ўқ отилган. Ҳарбийлар КА-1 енгил ҳужумчи самолётини ҳам ҳавога кўтарган, бироқ номаълум сабабга кўра, у Сеулдан 140 километр шарқда жойлашган Хонсон округида қулаб тушган.
«Ҳар икки учувчи ҳам эсон-омон қочиб қутулган», — дейди ҳарбийлар.
Хавфсизлик нуқтаи назаридан Жанубий Кореянинг Гимпо ва Инчхондаги иккита йирик аэропортида парвозлар бир соатга тўхтатилди.
Изоҳ (0)