“Rossiya va AQSH dushmanlikka shunchalik chuqur g‘arq bo‘lganki, Yangi yil qutlovlariga o‘rin yo‘q” — Peskov

Rossiya prezidenti Vladimir Putin amerikalik hamkasbi Jo Baydenni Yangi yil bilan tabriklamaydi, deya jurnalistlarga ma’lum qildi Kreml vakili Dmitriy Peskov.

“Hozir biz o‘zaro dushmanlikka shunchalik chuqur g‘arq bo‘lganmizki, qutlovlarga o‘rin yo‘q”, — deya aniqlik kiritdi u. “Bu barcha do‘st bo‘lmagan mamlakatlarga ham taalluqlimi?” — degan savolga Peskov aniq javob bera olmasligini aytdi.

Putin yaqin orada Fransiya prezidenti Emmanuel Makron bilan ham qo‘ng‘iroqlashmoqchi emas. Ayni vaqtda, yil oxiriga qadar Rossiya prezidenti Xitoy yetakchisi Si Szinpin bilan muloqot qilishni rejalashtirgan, deya qo‘shib qo‘ydi Peskov.

O‘tgan yili Putin dunyo yetakchilarining ko‘pchiligini, shu jumladan, Bayden va Makronni Yangi yil va Rojdestvo bilan qutlagandi. Sobiq davlat rahbarlari, xususan, Jorj Bush va Nikolya Sarkoziga ham tabrik yo‘llangandi. Putin tabriklamaganlar orasida esa Ukraina va Gruziya prezidentlari Vladimir Zelenskiy va Salome Zurabishvili bor edi.

Ukrainada Rossiya harbiy operatsiyasi boshlanganidan buyon Makron Putin bilan 13 marta aloqada bo‘lgan hamda u bilan muloqotni saqlab turish tarafdori bo‘lgan yetakchilardan biri edi. Putin Fransiya prezidentidan ko‘ra ko‘proq muloqotda bo‘lganlar — faqat Turkiya va Belarus rahbarlari Rajab Toyyib Erdo‘g‘on (15 marta) va Aleksandr Lukashenkodir (18 marta).

20-dekabr kuni Fransiya prezidenti Zelenskiy va MAGATE rahbari Rafael Grossi bilan muzokaralardan keyin Putin bilan qo‘ng‘iroqlashish rejalarini e’lon qilgandi. Makron Putin bilan Zaporojye atom elektr stansiyasida fuqarolik infratuzilmasi yadroviy xavfsizligi haqida gaplashmoqchi bo‘lgandi. Ertasi kuni Makron tug‘ilgan kunini nishonladi, ammo ular Putin bilan qo‘ng‘iroqlashmadi, tabriknoma yuborilgani haqida esa Kreml sayti xabar bermadi.