«Россия ва АҚШ душманликка шунчалик чуқур ғарқ бўлганки, Янги йил қутловларига ўрин йўқ» — Песков

Россия президенти Владимир Путин америкалик ҳамкасби Жо Байденни Янги йил билан табрикламайди, дея журналистларга маълум қилди Кремль вакили Дмитрий Песков.

«Ҳозир биз ўзаро душманликка шунчалик чуқур ғарқ бўлганмизки, қутловларга ўрин йўқ», — дея аниқлик киритди у. «Бу барча дўст бўлмаган мамлакатларга ҳам тааллуқлими?» — деган саволга Песков аниқ жавоб бера олмаслигини айтди.

Путин яқин орада Франция президенти Эммануэль Макрон билан ҳам қўнғироқлашмоқчи эмас. Айни вақтда, йил охирига қадар Россия президенти Хитой етакчиси Си Цзиньпин билан мулоқот қилишни режалаштирган, дея қўшиб қўйди Песков.

Ўтган йили Путин дунё етакчиларининг кўпчилигини, шу жумладан, Байден ва Макронни Янги йил ва Рождество билан қутлаганди. Собиқ давлат раҳбарлари, хусусан, Жорж Буш ва Николя Саркозига ҳам табрик йўлланганди. Путин табрикламаганлар орасида эса Украина ва Грузия президентлари Владимир Зеленский ва Саломе Зурабишвили бор эди.

Украинада Россия ҳарбий операцияси бошланганидан буён Макрон Путин билан 13 марта алоқада бўлган ҳамда у билан мулоқотни сақлаб туриш тарафдори бўлган етакчилардан бири эди. Путин Франция президентидан кўра кўпроқ мулоқотда бўлганлар — фақат Туркия ва Беларусь раҳбарлари Ражаб Тоййиб Эрдўғон (15 марта) ва Александр Лукашенкодир (18 марта).

20 декабрь куни Франция президенти Зеленский ва МАГАТЭ раҳбари Рафаэл Гросси билан музокаралардан кейин Путин билан қўнғироқлашиш режаларини эълон қилганди. Макрон Путин билан Запорожье атом электр станциясида фуқаролик инфратузилмаси ядровий хавфсизлиги ҳақида гаплашмоқчи бўлганди. Эртаси куни Макрон туғилган кунини нишонлади, аммо улар Путин билан қўнғироқлашмади, табрикнома юборилгани ҳақида эса Кремль сайти хабар бермади.