Nepalda sobiq kommunistik isyonchilar yetakchisi Pushpa Kamal Dahal mamlakat yangi bosh vaziri bo‘ldi. Bu haqda Nepal prezident Bidxi Devi Bxandarining idorasida ma’lum qilindi.
Siyosatchi 26-dekabr kuni qasamyod qilishi kutilmoqda.
Dahal Prachanda nomi bilan tanilgan. 68 yoshli siyosatchi uchinchi marta Nepal hukumatini boshqaradi. Uning nomzodini Vakillar palatasi – parlament quyi palatasining 275 nafar deputatidan 169 nafari qo‘llab-quvvatladi. Rasmiy ravishda, Dahal hali ishonch votumini olmagan.
Dahal bir necha partiyalar tomonidan qo‘llab-quvvatlandi
Kommunistik isyonchilarning sobiq yetakchisi bosh vazir etib tayinlanishi mamlakat uchun kutilmagan voqea bo‘ldi. Dahal boshchiligidagi Nepal Kommunistik partiyasi noyabr oyida bo‘lib o‘tgan parlament saylovlarida 275 o‘rindan atigi 32 tasini qo‘lga kiritib, uchinchi o‘rinni egallagandi.
Siyosatchini bir qancha boshqa partiyalar va mustaqil nomzodlar qo‘llab-quvvatlamoqda. dpa agentligiga ko‘ra, bu hukumati tez-tez o‘zgarib turadigan mamlakatdagi siyosiy beqarorlikni kuchaytirishi mumkin, chunki yangi bosh vazir ko‘plab hamkorlarni birlashtirishi kerak bo‘ladi.
Dahal dehqon oilasida tug‘ilgan va siyosatga kirishdan oldin o‘qituvchi bo‘lib ishlagan. U 1996—2006-yillardagi Nepal fuqarolar urushi davrida kommunistlar monarxiyaga barham berishga uringan yetakchilardan biri edi.
Urushda 17 mingga yaqin odam halok bo‘ldi. Urush tugaganidan ikki yil o‘tgach, hind monarxiyasi ag‘darildi. 2008—2009 va 2016—2017-yillarda ham Daham Nepalda bosh vazir lavozimida ishlagan.
Xitoy va Hindiston Nepaldagi saylovlarni kuzatib bordi
BMT ma’lumotlariga ko‘ra, Nepal dunyodagi eng kam rivojlangan davlatlardan biri. Jahon banki ma’lumotlariga ko‘ra, aholi jon boshiga yalpi ichki mahsulot 2021-yilda bu mamlakatda qariyb 1200 AQSH dollarini tashkil etdi.
Nepaldagi umumiy saylovlar mamlakatda strategik va iqtisodiy manfaatlarga ega bo‘lgan qo‘shni Xitoy va Hindiston tomonidan yaqindan kuzatildi.
Xitoy Nepalda “Yangi Ipak Yo‘li” tashabbusi doirasida loyihalarni amalga oshirishni va shu tariqa mamlakatni o‘zi bilan yanada mustahkam bo‘g‘lashni rejalashtirmoqda.
Hindiston, o‘z navbatida, hind aholisi ko‘p bo‘lgan Nepalga an’anaviy tarzda siyosiy kuch sifatida qaraydi va o‘zaro chambarchas bog‘liqlikka intiladi.
Izoh (0)