2022-yilda O‘zbekiston sog‘liqni saqlash tizimiga 28 trillion so‘m mablag‘ ajratildi. Bu raqam o‘tgan yilga nisbatan 1,3 baravar ko‘p degani.
Joriy yilning o‘tgan davrida respublikada 106 ta yangi oilaviy shifokor punkti va poliklinikalar, 1 000 ta mahalla tibbiyot punkti tashkil etildi. Bu orqali birlamchi tibbiy xizmati yana 3,5 million aholiga yetib bormoqda.
Onkolog shifokor Maqsud Mallayev “Daryo”ga bergan intervyusida sog‘liqni saqlash sohasida yuz bergan bir qator o‘zgarishlar haqida gapirdi.
“Joriy yilda davlat klinikalariga tengma-teng raqobat qila oladigan xususiy klinikalar soni keskin oshdi. Bu tibbiyotga berilayotgan yengilliklardan dalolat. 2000-yillarda bitta xususiy klinikani ochish uchun byurokratizm va ko‘plab qiyinchiliklar bo‘lardi. Hozirda xususiy klinika ochishda muammolar yo‘q. Qolaversa, bu yo‘nalishda davlat tomonidan subsidiyalar ham beriladi.
2022-yil davomida shifokor punktlari va poliklinikalardagi tor mutaxassislar soni ham sezilarli darajada oshirildi. Mahallabay ishlash tizimi tibbiyot yo‘nalishiga ham kirib bordi. Kasalliklarni to‘liq ro‘yxatga olish, bemorlarni to‘g‘ri yo‘naltirish tizimining joriy etilishini yil yangiligi deyish mumkin”, — dedi shifokor.
[caption id="attachment_2292103" align="aligncenter" width="1920"]
Maqsud Mallayev
Foto: “Daryo”
Joriy yilda O‘zbekistondagi 820 ta birlamchi tibbiyot muassasalariga UZI va EKG uskunalari yetkazib berildi. Oilaviy shifokorlar tomonidan bepul tarqatiladigan dorilar 45 turdan 70 turga ko‘paydi. Bunga ajratilayotgan mablag‘lar hajmi ham o‘tgan yilga nisbatan 3 baravar oshirildi, ya’ni 188 milliard so‘mdan 540 milliard so‘mga yetkazildi.
Yil davomida oilaviy poliklinikalarda 19 ming 500 ta kunduzgi shifo o‘rinlari tashkil etildi. Buning natijasida 740 ming aholiga shifoxonaga bormasdan, mahallaning o‘zida davolanish imkoniyati yaratildi.
2022-yilda tibbiyot xodimlarining oyligi 30 foizgacha oshirilib, shifokorlarga ish samaradorligi va natijasiga qarab tabaqalashtirilgan rag‘batlantirish va ustama to‘lovlari joriy etildi.
“Shifokorlar oyliklarining oshirilishi, ularni moddiy rag‘batlantirishlar, tibbiyot xodimlariga sog‘liqni saqlash faxriysi va boshqa medallar berilishi ham muhim o‘zgarishlardan hisoblanadi. Bular davlatga har bir shifokor qanchalik muhimligini ko‘rsatib beruvchi e’tibordir. Hamma ham o‘zining qilgan ishini oliy darajada baholanishini ko‘rsa, yana ikki barobar yaxshi ishlashga harakat qiladi”, — dedi Maqsud Mallayev.
Shifokorning qo‘shimcha qilishicha, yil davomida onkologiya sohasida ham bir qator o‘zgarishlar amalga oshirilgan.
“2022-yilda onkologiya bo‘yicha har bir viloyatga nur terapiya apparatlari yetkazildi. Oldinlari bunday uskunalar respublikadagi 2-3 ta joyda bo‘lardi. Buning oqibatida juda uzoq navbatlar yuzaga kelar, bemorlarning yarimidan ko‘pi nur ololmasdi. Uskunalar yetishmasligi sababli tizimda korrupsiyaga yo‘l ochilardi.
Hozirda hamma viloyatlarga nur terapiya uskunalari kirib bordi. Bu onkologiyadagi yangi yutuqlardan biri.
Bundan tashqari, sohamizda dori-darmonlar boshqa yo‘nalishlarga nisbatan ancha qimmat. Shunga qaramasdan davlat tomonidan aksariyat bemorlarga dori-darmonlarning ko‘p qismi qoplab berilmoqda. Bu ham onkologiyaning bitta yutug‘i.
Hozirgi kunda bizning onkologiyamiz Yevropa yoki dunyoning har qanday davlati onkologiyasi bilan bemalol tenglasha oladi”, — dedi shifokor.
Maqsud Mallayevning aytishicha, bugungi kunda chet eldan kelgan mutaxassislarga O‘zbekistonda master-klass va operatsiyalar o‘tkazish imkoniyati kengaygan.
“Eslayman, 2014-2016-yillar oralig‘ida hamyurtlarimiz orqasida chet elga davolanish uchun ketish avjiga chiqdi. Chunki xorijda tibbiyot sifati yuqoriligi aytilardi. Hozir chet el mutaxassislarini o‘zimizga olib kelib, operatsiya qildirish amaliyoti boshlangan. Ya’ni xorijga 100 kishi ketmayapti-da, u yoqdan bir shifokor kelib, shu yerning o‘zida 100 nafar bemorni operatsiya qilmoqda. Bunda yo‘lkira va chet eldagi klinikalarga sarflanadigan mablag‘lar o‘zimizda qolmoqda. Bu tibbiyotga ketayotgan xarajatlarni 70-80 foizga qisqartirib bermoqda. Qolaversa, o‘zimizning shifokorlar ham xorijliklardan bilim o‘rganib, ularning darajasiga chiqmoqda. Bu 2022-yil hisobidan baralla gapirish kerak bo‘lgan yana bir katta yutuq”, — dedi Maqsud Mallayev.
Prezident Shavkat Mirziyoyev 20-dekabr kuni Oliy Majlisga qilgan murojaatida 2023-yilda respublikada 140 ta oilaviy shifokor punkti va poliklinikalar, 520 ta olis va chekka mahallada ixcham tibbiyot punktlari tashkil etilishini ma’lum qildi.
Shu bilan birga, kelasi yili onalar va bolalar salomatligini muhofaza qilish bo‘yicha uch yillik katta dastur amalga oshiriladi. Barcha tug‘ruq komplekslari to‘liq ta’mirlanadi va jihozlanadi, o‘rinlar soni 35 foizga ko‘paytiriladi.
Hozir mamlakatda 15 mingga yaqin onkologik bemorlar nur yordamida davolanishga muhtoj. Shu bois, kelasi yilda Samarqand, Farg‘ona va Xorazmda xususiy sherikchilik asosida Radiologiya markazlarini tashkil etish loyihalari boshlanadi.
Islombek Umaraliyev suhbatlashdi
Izoh (0)