Jizzax viloyatining Sharof Rashidov tumanida er janjal sabab xotinini pichoqlab o‘ldirdi. Bu haqda viloyat IIB matbuot xizmati xabar berdi.
Ma’lum qilinishicha, 19-dekabr kuni soat 18:00 larda 1972-yilda tug‘ilgan B.I. va turmush o‘rtogi N.I. o‘rtasida oilaviy kelishmovchilik sababli janjal kelib chiqqan. Janjal vaqtida er qo‘lida bo‘lgan oshxona pichog‘i bilan turmush o‘rtog‘ining o‘ng yelka qismiga urib tan jarohati yetkazgan.
Oqibatda 1975-yilda tug‘ilgan N.I. og‘ir tan jarohati olib respublika shoshilinch tibbiy yordam ilmiy markazining Jizzax filialida ko‘rsatilgan muolajalarga qaramasdan vafot etgan. B.I. protsessual tartibda ushlanib, vaqtincha saqlash hibsxonasiga joylashtirilgan.
Xabarda aytilishicha, er shu vaqtga qadar spirtli ichimlik iste’mol qiluvchilar va oilaviy janjalkashlar sifatida IIOning profilaktik hisobida turmagan. Shuningdek ushbu oila mahallada ijobiy tavsiflanib, janjalkash oilalar ro‘yxatida turmagan.
Ayni paytda holat yuzasidan Jinoyat kodeksining 104- moddasi 3- qismi “d” bandi bilan jinoyat ishi qo‘zg‘atilib, dastlabki tergov harakatlari olib borilmoqda.
Avvalroq viloyatning ushbu tumanda er 39 yoshli xotinini urib o‘ldirib qo‘ygandi. Viloyatning Zarbdor tumanida ham er janjal tufayli o‘z xotinining qotiliga aylangandi.
Mavzuga doir: Toshkent viloyatida ayol mast holda erini pichoqlab o‘ldirdi
Izoh (0)