O‘zbekiston hukumati delegatsiyasining 24-dekabr kuni Ozarbayjonga tashrifi doirasida investitsiyalar va tashqi savdo vaziri Jamshid Xo‘jayev “Alyat” erkin iqtisodiy zonasi va “Boku xalqaro dengiz savdo porti” rahbariyati bilan uchrashuvlar o‘tkazdi, deb xabar bermoqda Investitsiyalar va tashqi savdo vazirligi matbuot xizmati.
Muzokaralar chog‘ida Ozarbayjon porti va EIZ resurslari va imkoniyatlaridan birgalikda foydalanish asosida sarmoyaviy, transport va logistika sohasidagi hamkorlikni yo‘lga qo‘yish istiqbollari muhokama qilingan.
Xususan, Ozarbayjon “Alyat” EIZ boshqaruvi raisi Valeh Aleskerov bilan erkin iqtisodiy zonada oziq-ovqat, charm-poyabzal, to‘qimachilik va boshqa yuqori talabga va qo‘shilgan qiymatga ega mahsulotlar ishlab chiqarish va Yevropa Ittifoqi mamlakatlari, MDH va boshqa qo‘shni davlatlar bozorlariga eksportni tashkil etish bo‘yicha qo‘shma loyihalarni amalga oshirishga urg‘u bergan holda sarmoyaviy hamkorlikni kengaytirish istiqbollari muhokama qilingan.
“Boku xalqaro dengiz savdo porti” bosh direktori Taleh Ziyadov bilan transport-logistika aloqalarini yanada kengaytirish, xususan, konteynerlar tashish va “Ro-Ro” usulida yuklarini dengiz portlari orqali yetkazish hajmini oshirish imkoniyatlari ko‘rib chiqilgan. Tomonlar Xalqaro avtomobil transporti to‘g‘risidagi hukumatlararo bitim imzolanganini olqishlagan.
Boku xalqaro dengiz savdo porti negizida o‘zbek omborlari va konteyner terminallarini ochish istiqbollari hamda yuklarni, jumladan, kundalik ehtiyojlar uchun zarur tovarlarni ikki davlat hududlari orqali o‘zaro tashish masalalarini muhokama qilish uchun xalqaro avtomobil transporti bo‘yicha Aralash komissiya yig‘ilishini o‘tkazish lozimligi ta’kidlangan.
Uchrashuvlar yakunida muhokama qilingan loyiha va tashabbuslarni amalga oshirish doirasida kelgusidagi hamkorlik formati kelishib olingan.
Mavzuga doir: O‘zbekiston O‘rta koridor orqali Yevropaga birinchi konteyner poyezdini yubordi
Izoh (0)