Namanganda 9 nafar fuqaroni chuv tushirgan “litsenziya bo‘limi xodimi” qo‘lga olindi. Bu haqda “Daryo” muxbiri Azizbek Abduvaliyev xabar bermoqda.

Norin tumanida yashovchi 24 yashar yigit Haqqulobod shaharchasi markazida Matiz haydovchisiga guvohnoma ko‘rsatib, o‘zini “litsenziya bo‘limi xodimi” sifatida tanishtiradi va avtomobil hujjatlarini so‘raydi.

Hujjatlarni olgach, mashinani shu hududga yaqin litsenziya bo‘limiga olib kirib, 1,6 million so‘m to‘lashi kerakligi, agar to‘lamasa jarimaga tortilishini aytadi. Shundan so‘ng haydovchidan litsenziya tayyorlab berish eaziga 100 dollar olib, shaxsiy ehtiyojlari uchun ishlatib yuboradi.

U keyinchalik jinoiy harakatlarini davom ettirib, yana 8 nafar fuqaroni aldov yo‘li bilan pullarini o‘zlashtirishga erishgani aytilmoqda.

Norin tuman IIB tergov bo‘limi boshlig‘i Hayotbek Abdurahimovning ma’lum qilishicha, soxta “litsenziya bo‘limi xodimi”ga nisbatan jinoyat ishi qo‘zg‘atilgan va qamoq ehtiyot chorasi qo‘llangan. Hozirda fuqarolarga yetkazilgan zararni qoplash choralari ko‘rilmoqda.

Mavzuga doir: Namanganda soxta DXX xodimi ushlandi (video)