Namanganda bank xodimlari mijozlar kartalaridan 86 mln so‘mdan ortiq pulni yechib olgani aniqlandi

Namanganda bank xodimlari xizmat mavqeyidan foydalangan holda pullarni o‘zlashtirdi, deb xabar bermoqda IIV Kiberxavfsizlik markazi.

Ma’lum qilinishicha, Namangan viloyati Namangan shahrida yashovchi bir guruh fuqarolar ariza bilan murojaat qilib, ularning bank kartasidan jami 86 million so‘mdan ortiq pullari noma’lum shaxs tomonidan yechib olinganini bildirib, unga nisbatan qonuniy chora ko‘rishni so‘ragan.

Olib borilgan tezkor-qidiruv tadbirlari natijasida pullarni o‘zlashtirgan shaxslar Namangan viloyati Namangan shahrida yashovchi, 2000-yilda tug‘ilgan bank xodimi U.A. va uning ish o‘rganuvchisi (stajyor) O.A. birgalikda amalga oshirgani aniqlangan.

Jinoyatchilar xizmat mavqeidan foydalangan holda mijozlar tomonidan ishonib topshirilgan bank kartalarini yangilab berish vaqtida bank kartalaridagi pullarni o‘zlashtirgani ma’lum bo‘lgan.

Ularga nisbatan Jinoyat kodeksining 169-moddasi (o‘g‘rilik) 3-qismi bilan jinoyat ishi qo‘zg‘atilib, tergov harakatlari olib borilmoqda.