“Daryo” internet-nashri Toshkent shahri hokimligi qoshidagi Jamoatchilik kengashi bilan birgalikda “Mahalla. Muammo. Mulohaza” loyihasini taqdim etib kelmoqda. Loyihaning 12-soni mavzusi “Jamoat transporti muammolari” bo‘lib, dastur mehmoni sifatida iqtisodchi Otabek Bakirov taklif etildi.
Iqtisodchining ta’kidlashicha, shahar transporti — xuddi tibbiyot, xavfsizlik, ta’lim singari hamma foydalanadigan va bahramand bo‘ladigan ijtimoiy ne’mat.
Jamoat transporti faqat ijtimoiy himoyaga muhtojlarniki emas, “chinovnik”lar, boylar, o‘rtahollar, nafaqaxo‘r va talabalar — hammaniki degan maxrajga qaytishimiz kerak. Ungacha jamoat transportini o‘zgartira olmaymiz, qavsdan tashqari, qoldiq prinsipi asosida qaror qabul qilishda davom etaveramiz.Yana bir masala — yangi qurilayotgan metro bekatlaridagi infratuzilma masalasi. Sovet davri va mustaqillik yillarida qurilgan metro bekatlarida to‘rt tomondan chiqish shakllantirilgan. Bu shaharsozlik bo‘yicha ham, xavfsizlik nuqtayi nazaridan ham talab qilingan standart. Masalan, Qo‘yliq va Sergeli metrolarining ikkinchi tomoni hamma vaqt yopiq.
Yerusti metrosi yo‘lning bir tarafida mavjud, ikkinchi tomonga o‘tish esa, ayniqsa, yosh bolali, homilador, pensionerlar uchun katta muammo. “Qo‘yliq” metrosining 4-bekati qarama-qarshisida “Seul” markazi, orqaroqda esa taxminan 20 ming odam yashaydigan yangi massivlar (Qalqon mahallasi) bor. Ularning daromadi unchalik yuqori emas, oylikka yashaydi, farzandlarini ham jamoat transportida olib yuradi. O‘sha tomonga borib ko‘ring, 12 ta yo‘l chizig‘i bor, svetofor yo‘q. Metro tomonga yo‘lning shuncha qismini svetoforsiz bosib o‘tish kerak. Ohangaron yo‘lida, asosan, yuk mashinalari yuqori tezlikda yuradi, bunaqa yo‘ldan o‘tib olish esa juda katta xavf. Yo‘lning bir tomoniga qurilgan yerusti metro bekatidan qarama-qarshi tarafga xavfsiz o‘tish infratuzilmasini yaratish haqida ham o‘ylasak, farzandlarimizni o‘qishga yuborib, xavotirda o‘tirmaymiz.Metro qurilganiga uch yildan oshdi. Balki, bu loyihalashtirilgandir, lekin haligacha natija yo‘q. Bu yo‘lovchilar uchun qurilgan ko‘priklarga ham taalluqli. Imkoniyati cheklangan odamlar yo‘lning bir tomonida qolishga yoki aravachasini ko‘tarib o‘tishga majbur. Liftlar yoki eskalatorlar haligacha ishlamaydi. Bu ham muhokama qilinayotgan jamoat transporti masalasining bir qismi, — deydi iqtisodchi.
Ko‘rsatuvni to‘liq tarzda “Daryo”ning YouTube’dagi sahifasi orqali tomosha qilish mumkin.
Izoh (0)