«Янги қурилган метро бекатларидаги инфратузилма яхши йўлга қўйилмаган» — Отабек Бакиров

«Дарё» интернет-нашри Тошкент шаҳри ҳокимлиги қошидаги Жамоатчилик кенгаши билан биргаликда «Маҳалла. Муаммо. Мулоҳаза» лойиҳасини тақдим этиб келмоқда. Лойиҳанинг 12-сони мавзуси «Жамоат транспорти муаммолари» бўлиб, дастур меҳмони сифатида иқтисодчи Отабек Бакиров таклиф этилди.

Иқтисодчининг таъкидлашича, шаҳар транспорти — худди тиббиёт, хавфсизлик, таълим сингари ҳамма фойдаланадиган ва баҳраманд бўладиган ижтимоий неъмат.

Жамоат транспорти фақат ижтимоий ҳимояга муҳтожларники эмас, «чиновник»лар, бойлар, ўртаҳоллар, нафақахўр ва талабалар — ҳамманики деган махражга қайтишимиз керак. Унгача жамоат транспортини ўзгартира олмаймиз, қавсдан ташқари, қолдиқ принципи асосида қарор қабул қилишда давом этаверамиз.

Яна бир масала — янги қурилаётган метро бекатларидаги инфратузилма масаласи. Совет даври ва мустақиллик йилларида қурилган метро бекатларида тўрт томондан чиқиш шакллантирилган. Бу шаҳарсозлик бўйича ҳам, хавфсизлик нуқтаи назаридан ҳам талаб қилинган стандарт. Масалан, Қўйлиқ ва Сергели метроларининг иккинчи томони ҳамма вақт ёпиқ.

Ерусти метроси йўлнинг бир тарафида мавжуд, иккинчи томонга ўтиш эса, айниқса, ёш болали, ҳомиладор, пенсионерлар учун катта муаммо. «Қўйлиқ» метросининг 4-бекати қарама-қаршисида «Сеул» маркази, орқароқда эса тахминан 20 минг одам яшайдиган янги массивлар (Қалқон маҳалласи) бор. Уларнинг даромади унчалик юқори эмас, ойликка яшайди, фарзандларини ҳам жамоат транспортида олиб юради. Ўша томонга бориб кўринг, 12 та йўл чизиғи бор, светофор йўқ. Метро томонга йўлнинг шунча қисмини светофорсиз босиб ўтиш керак. Оҳангарон йўлида, асосан, юк машиналари юқори тезликда юради, бунақа йўлдан ўтиб олиш эса жуда катта хавф. Йўлнинг бир томонига қурилган ерусти метро бекатидан қарама-қарши тарафга хавфсиз ўтиш инфратузилмасини яратиш ҳақида ҳам ўйласак, фарзандларимизни ўқишга юбориб, хавотирда ўтирмаймиз.

Метро қурилганига уч йилдан ошди. Балки, бу лойиҳалаштирилгандир, лекин ҳалигача натижа йўқ. Бу йўловчилар учун қурилган кўприкларга ҳам тааллуқли. Имконияти чекланган одамлар йўлнинг бир томонида қолишга ёки аравачасини кўтариб ўтишга мажбур. Лифтлар ёки эскалаторлар ҳалигача ишламайди. Бу ҳам муҳокама қилинаётган жамоат транспорти масаласининг бир қисми, — дейди иқтисодчи.

Кўрсатувни тўлиқ тарзда «Дарё»нинг YouTube’даги саҳифаси орқали томоша қилиш мумкин.