Қирғизистон Ташқи ишлар вазирлиги мамлакат фуқароларини Тожикистонга бормасликка чақирди. Бу ҳақда AKIpress хабар берди.
Вазирлик ҳолат юзасидан 22 декабрь куни аҳолига мурожаат қилди. Унда қирғизистонликларнинг Тожикистонга киришини чеклаш чоралари давом этаётгани келтириб ўтилган. Шу муносабат билан Ташқи ишлар вазирлиги қирғиз халқидан Тожикистонга ҳар қандай саёҳатлардан тийилишни ёки Тожикистон орқали транзитни амалга оширмасликни сўрамоқда.
Октябрь ойида ҳам қирғизистонликларга Тожикистонга бормаслик сўралганди. Бунга Тожикистонда Душанбе халқаро аэропортидаги назорат-ўтказиш пунктида Қирғизистон фуқароларининг кириши асоссиз чекланиши сабаб бўлган.
Тожикистон ҳудудида қирғизларнинг ҳуқуқлари бузилган ёки уларга нисбатан нохолис қарашлар намоён бўлган тақдирда, Қирғизистон ТИВ Консуллик бошқармасига мурожаат қилиш сўралган.
Маълумот ўрнида, ноябрь ойида Қирғизистоннинг чегарага яқин аҳолисига ватан ҳимояси учун қурол ишлатишга рухсат берилиши ҳақида хабар берилган.
3 декабрь куни Тожикистон ва Қирғизистон фуқаролари ўртасида чегарада жанжал содир бўлди. Қирғизистон фуқаролари Тожикистоннинг Чоркуҳ жамоати Сомониён қишлоғи фуқаросини арматура билан дўппослаган. Шундан кейин қирғизистонлик чегарачилар Тожикистон томонига қарата бир неча марта ўқ узган. Жабрланувчи касалхонага ётқизилган.
Қирғизистон томони жанжал «Қирғизистон фуқароси М.Н. ва Тожикистон фуқаролари ўртасидаги даҳанаки жанг»дан кейин бошланганини билдирган.
Изоҳ (0)