Yevropa Ittifoqi Markaziy Osiyoga Rossiya va Xitoydan ko‘ra ko‘proq sarmoya kiritadi. Bu haqda Yevropa diplomatiyasi rahbari Xosep Borrellga tayanib, “Kommersant” xabar bermoqda.
Shubhasiz, biz Markaziy Osiyodagi eng yirik investormiz. Oxirgi 10 yil ichida Yevropa Ittifoqiga a’zo davlatlar Markaziy Osiyo davlatlariga 105 milliard yevrodan ortiq sarmoya kiritdi, — dedi Xosep Borrell.
Unga ko‘ra, bu mintaqadagi to‘g‘ridan to‘g‘ri xorijiy investitsiyalar umumiy hajmining 40 foizidan oshib ketdi. Bu Rossiya va Xitoy sarmoya kiritayotganidan ham ko‘p.
Shuningdek, u bundan ham ko‘proq narsa qilishga tayyor ekanliklarini bildirdi.
Yevropa diplomatiyasi rahbari Xosep Borrell Samarqandda Yevropa Ittifoqi va Markaziy Osiyoning o‘zaro bog‘liqligiga bag‘ishlangan xalqaro anjumanda ishtirok etdi.
Diplomatga ko‘ra, Yevropa Ittifoqi ham Markaziy Osiyodagi hamkorlari kabi “strategik muxtoriyat” sari intilmoqda.
Haddan tashqari qaramlik va tanlovning yetishmasligi juda qimmatga tushadi. Bugun esa Yevropada biz energiya xavfsizligi, shuningdek, boshqa muhim sohalar: raqamli infratuzilma, xavfsizlik arxitekturasi, shuningdek, oziq-ovqat ta’minoti va eng muhim xomashyodan foydalanish haqida gap ketganda buni juda yaqqol ko‘ryapmiz, — deya qo‘shimcha qildi Borrell.
Konferensiyada u, shuningdek, Yevropa Ittifoqining mintaqa davlatlari bilan suv, energetika, iqlim o‘zgarishi va raqamli ulanish bo‘yicha hamkorligi tashabbuslarini taqdim etdi. Bu esa Markaziy Osiyoning sun’iy yo‘ldosh aloqalari orqali global internet tarmog‘iga kirishini oshiradi.
Avvalroq O‘zbekiston Markaziy Osiyodagi qaysi davlatlar bilan eng ko‘p savdo qilayotgani ma’lum bo‘lgani haqida xabar berilgandi.
Izoh (0)