Ўзбекистонда муомаладаги банк карталари сони 33,5 миллиондан ошди

Ўзбекистонда 2022 йилнинг 1 декабрь ҳолатига кўра, муомаладаги банк карталари сони 33,5 миллион донага етган. Бу ҳақда Марказий банк маълум қилди.

Сентябрь ойида карталар сони йил бошидан бери энг кўп — 620 мингтага кескин кўпайган эди. Октябрда бу кўрсаткич 577 минг донани ташкил қилганди. Йил бошидан бери 5,3 млн дона банк картаси муомалага киритилган. Ноябрь ойида эса 1,1 млн дона банк карталари муомалага киритилган. 

Йил бошидан бери банклар ва тўлов ташкилотлари томонидан ўрнатилган банкомат ва инфокиосклар сони 20,3 мингтани ташкил этган. 

Муомалага карталар чиқариш бўйича банклар орасида 6,9 млн дона карта билан «Халқ банки» етакчилик қилмоқда.

Иккинчи ўринни 3,9 млн банк картаси билан «Агробанк» эгаллаган бўлса, 3,1 млн кўрсаткич билан «Ипотека банк» учинчи бўлди. 

Ўрнатилган банкомат ва инфокиосклар сони бўйича «Халқ банки» «Капиталбанк» ва «Агробанк»ни ортда қолдириб биринчи ўринга чиқиб олди. Ноябрь ойида «Халқ банки» томонидан 325 дона банкомат ва инфокиосклар ишга туширилди ва уларнинг умумий сони 2 204 тага етди. 

Мазкур кўрсаткич бўйича иккинчи ўринда «Агробанк», учинчи ўринда «Капиталбанк» бормоқда — мос равишда 2 107 та ва 2 100 та. 

Аввалроқ Ўзбекистон банклари ўн бир ойда қарийб 9 трлн сўмлик соф фойдага эришгани ҳақида хабар берилган эди.