Афғонистонда ҳокимият тепасида турган «Толибон» ҳаракати ҳибсдаги икки америкаликни озод қилди. Бу ҳақда АҚШ Давлат департаменти матбуот котиби Нед Прайс брифинг чоғида айтиб ўтди.
Прайсдан АҚШнинг икки фуқароси Афғонистондаги қамоқхонадан озод қилингани ва Қатар пойтахти Доҳага учиб кетгани ҳақидаги хабарларга изоҳ бериш сўралган. Журналистлардан бири «Толибон»нинг маҳбусларни озод қилиши эвазига АҚШ уларга нима таклиф қилганига қизиқди.
«Буни ‘Толибон’ тарафидан яхши ният ишораси деб тушуняпмиз. Бу қайсидир қўлга олинганлар ёки маҳбуслар алмашинувининг бир қисми эмасди. Биз, албатта, бу икки америкаликнинг озод этилишини олқишлаймиз», — деб жавоб берди Давлат департаменти вакили.
«Афғонистонда яна шундай АҚШ фуқаролари борми?» — деган саволга Прайс «Толибон» томонидан ҳибсга олинган америкаликлар ҳақида батафсил маълумот беролмаслигини айтди.
АҚШнинг икки фуқароси «Толибон» томонидан озод этилгани ҳақида 20 декабрь куни CNN телеканали масаладан хабардор уч манбага таяниб хабар берганди. Суҳбатдошларнинг телеканалга айтишича, озод этилган америкаликлар Қатарга кетган. Манбаларга кўра, озод этилганлардан бири режиссёр Айвор Ширер. У афғон продюсери Файзулла Файзбахш билан бирга 2022 йилнинг августида Кобулда фильм суратга олиш вақтида ҳибсга олинган, деб ёзади телеканал ҳуқуқ ҳимоячиларига таяниб. Иккинчи америкаликнинг номи унинг оиласи илтимосига кўра ошкор этилмаган.
Сентябрь ойида АҚШ президенти Жо Баден «Толибон» асосчиси Муҳаммад Умар Мужоҳиднинг энг яқин шерикларидан бири Башир Нурзайни америкалик Марк Фрерихснинг Афғонистондаги асирликдан озод қилиниши эвазига афв этганди, деб ёзади Reuters. Нурзай қамоқда 17 йил ўтирган. АҚШ расмийлари уни Америка ва Европага 50 миллион доллардан ортиқ героин контрабандасида айблаган. Нурзайнинг адвокати унинг контрабандага алоқадорлигини рад этган.
Фрерихс қурилиш муҳандиси ва АҚШ денгиз флоти фахрийси. Афғонистонда қурилиш лойиҳаларида ишлаган бу америкалик 2020 йил январь ойида ўғирлаб кетилган.
Изоҳ (0)