Россия президенти матбуот котиби Дмитрий Песков Владимир Путин, гўёки, биринчи марта жанговар ҳаракатлар зонасига боргани ҳақидаги ахборот юзасидан изоҳ берди.
20 декабрь куни Давлат думасининг «Ягона Россия»дан депутати, истеъфодаги генерал-лейтенант Андрей Гурулев ўз Telegram-каналига Владимир Соловёвнинг «Тўлиқ контакт» дастуридан парчани жойлади. Унда Гурулевнинг ўзи Путин «махсус ҳарбий операция зонасида бўлгани» ҳақида айтган.
«Айнан махсус ҳарбий операция зонасига ташриф буюриш ҳақида гапирадиган бўлсак, бу ерда, албатта, олий бош қўмондон нафақат вазият ҳақидаги ҳисоботларни тинглаб, нимадир ҳақида гапиргани эмас, балки барча қўмондонлар билан шахсан музокара қилиб, ҳар бирини шахсан тинглагани жуда муҳимдир», — деди Гурулев.
Песков «Российская газета» нашрига депутатнинг гапларини қуйидагича изоҳлади: «Агар Гурулев Путин жума куни борган штабни назарда тутган бўлса, унда ҳа». Песков бошқа тушунтириш бермади. «Российская газета» унинг изоҳларидан иборат хабарни «Кремль Путиннинг махсус ҳарбий операция зонасига борганини тасдиқлади» деган сарлавҳа остида эълон қилди.
Аввалроқ Кремль Владимир Путин 16 декабрь куни махсус операцияга жалб қилинган қўшинлар бирлашган штабига ташриф буюргани ва у ерда Россия армияси олий қўмондонлиги билан мажлис ўтказгани ҳақида хабар берганди. Бу штаб айнан қаерда жойлашганига хабарда аниқлик киритилмаган.
«Агенцтво» нашри штабдан олинган видеони таҳлил қилиб, гап Жанубий ҳарбий округ ҳақида бораётганини аниқлади. Мудофаа вазирлиги маълумотларига кўра, у Ростов-Донда жойлашган.
Расман Путин жанговар ҳаракатлар зонасига бирор марта ҳам боргани йўқ. Ўз навбатида, Украина президенти Владимир Зеленский тўлиқ кўламли урушнинг 300-кунида Бахмутга келди. Донецк вилоятидаги ушбу шаҳарда сўнгги ойларда энг оғир жанглар бормоқда.
Аввалроқ Владимир Путин Донбассга боришни режалаштирмаётгани хабар берилганди. У Донбассга «мавриди келганида» боради, аммо ҳозирча бундай ташриф режада йўқ, деганди Россия раҳбарининг матбуот котиби Дмитрий Песков.
Изоҳ (0)