O‘zbekiston hududlarining yashash uchun qulaylik reytingi (Liveability ranking) tuzildi. Bu haqda Prognozlashtirish va makroiqtisodiy tadqiqotlar instituti xabar berdi.
Bunda The Economist Intelligence Unit nashri tomonidan har yili dunyo shaharlari bo‘yicha e’lon qilinadigan The Global Liveability Ranking metodologiyasidan foydalanildi.
Reyting hududlardagi ijtimoiy osoyishtalik, sog‘liqni saqlash, ta’lim, madaniyat, atrof-muhit va infratuzilmaviy qulayliklar kabi yo‘nalishlarga oid 37 ta ko‘rsatkichni o‘zida jamlagan kompozit indeks asosida tuzilgan bo‘lib, 2020—2021-yillar uchun hisoblandi.
Tahlil natijalariga ko‘ra, Toshkent shahri (reyting ko‘rsatkichi 65), Buxoro (57), Navoiy (49), va Farg‘ona (48) viloyatlari 2021-yilda O‘zbekistonda yashash uchun eng qulay hududlar bo‘lgani aniqlandi.
Yo‘nalishlar bo‘yicha eng yaxshi natijalar
- Ijtimoiy osoyishtalik: Navoiy viloyati (69)
- Sog‘liqni saqlash: Toshkent shahri (75)
- Madaniyat va atrof-muhit: Toshkent shahri (70)
- Ta’lim: Qoraqalpog‘iston Respublikasi (63)
- Infratuzilmaviy imkoniyatlar: Toshkent shahri (85)
2020—2021-yillarda reyting holatida quyidagi o‘zgarishlar ro‘y berdi:
Farg‘ona viloyati 7-pog‘onadan 4-pog‘onaga, Toshkent viloyati 12-pog‘onadan 9-pog‘onaga ko‘tarilgan bo‘lsa, Qoraqalpog‘iston 9-pog‘onadan 12-pog‘onaga, Samarqand viloyati 4-pog‘onadan 5-pog‘onaga, Jizzax viloyati 5-pog‘onadan 6-pog‘onaga hamda Andijon viloyati 5-pog‘onadan 6-pog‘onaga tushgan.
2020—2021-yillar davomida O‘zbekistondagi barqarorlik ko‘rsatkichi +1 punktga, sog‘liqni saqlash yo‘nalishi ko‘rsatkichi +1,4 punktga, ta’lim ko‘rsatkichi +3,1 punktga, infratuzilmalar ko‘rsatkichi +0,5 punktga ortgan bo‘lsa, madaniyat va atrof-muhit yo‘nalishi ko‘rsatkichi -0,2 punktga pasaygan.
Tadqiqot davrida eng yaxshi natija ta’lim yo‘nalishida qayd etildi. Bu yo‘nalish bo‘yicha ijobiy natijalarni masofaviy ta’lim platformalari ishga tushirilishi, oliy ta’lim muassasalari qabul kvotalarining oshirilishi bilan izohlash mumkin.
O‘zbekiston hududlarining yashash uchun qulaylik indeksi hududlarning kompleks rivojlanish darajasi, yashash va ishlash imkoniyatlari, turistik salohiyatini taqqoslashga yordam beradi.
Avvalroq malakali mutaxassislar uchun 2022-yildagi eng jozibador davlatlar reytingi e’lon qilingani haqida xabar berilgandi.
Izoh (0)