Ukraina atrofidagi vaziyatdan kelib chiqqan holda Rossiya gazidan voz kechish Yevropaga 1 trillion dollarga yaqin zarar keltirdi. Bu haqda Bloomberg o‘z hisob-kitoblariga tayanib xabar berdi.
Ma’lumotlarga ko‘ra, bu miqdor Yevropa kompaniyalari va iste’molchilari uchun elektr energiyasi narxi oshishi bilan bog‘liq.
Shu bilan birga, agentlik prognoz qilganidek, bu so‘nggi o‘n yilliklardagi eng yirik energetika inqirozining boshlanishi, xolos.
Qish mavsumidan keyin gaz omborlari bo‘sh bo‘ladi va Rossiyaning minimal gaz ta’minoti sharoitida ularni to‘ldirish qiyin bo‘ladi.
Agentlik ma’lumotlariga ko‘ra, Yevropaga suyultirilgan gaz yetkazib berish bo‘yicha keskin vaziyat kamida Qatar va AQSH uglevodorod qazib olishni yetarli darajada oshira oladigan 2026-yilgacha davom etadi.
“YIning tabiiy gaz zaxiralarini to‘ldirish uchun poygasi allaqachon boshlangan. Gaz sotuvchilari uchun qulay muhit kamida 12 oy davom etadi”, — dedi Skandinaviska Enskilda Banken (SEB) tahlilchisi Bjarne Shildrop.
Bloomberg tahlilchilarining fikricha, agar Yevropa Ittifoqida tabiiy gaz narxi yana bir MVt/soat uchun 210 yevrogacha ko‘tarilsa, u holda Yevropa retsessiya o‘rniga keskin iqtisodiy tanazzulga yuz tutadi.
Shu hafta boshida Yevropa Ittifoqi energetika vazirlari Bryusseldagi yig‘ilishda gaz narxining yuqori chegarasini joriy etish bo‘yicha kelisha olmadi va bu masalani muhokama qilishni 19-dekabrda davom ettirishga qaror qildi.
Izoh (0)