Toshkentning Mirobod tumanida fuqaro tez yordam xodimlariga kuch ishlatib, mashinasiga ham jiddiy zarar yetkazgani haqida xabar berilgan edi. Sud hukmi bilan unga nisbatan jazo tayinlandi.
Voqea 16-oktabr kuni soat 18:50 atrofida Toshkent shahrining Mirobod tumani, Temiryo‘lchilar ko‘chasidagi ko‘p qavatli uy oldida sodir bo‘lgandi. Tez yordam xodimlari manzilga kelganida, ko‘chada bemorligi aytilgan 22 yoshli fuqaro M.A. noadekvat holatda yon-atrofdagi kishilarga tajovuz qilayotgani ma’lum bo‘lgan. “103” ko‘chma brigadasi unga birinchi tibbiy yordam ko‘rsatmoqchi bo‘lganda, mushtumzo‘r fuqaro shifokorlarga kuch ishlatib, tez yordam mashinasiga ham jiddiy zarar yetkazgan.
“Milliy” telekanalining “Millar” informatsion dasturida ma’lum qilinishicha, Jinoyat ishlari bo‘yicha Mirobod tuman sudida sudlanuvchi aybiga iqror bo‘lib, qilgan ishidan pushaymonligini bildirgan.
U Jinoyat kodeksining 277-moddasi (bezorilik) 3-qismi “g” bandida nazarda tutilgan jinoyatni sodir etganlikda aybli deb topilib, 2 yil muddatga ozodlikdan mahrum qilindi.
Izoh (0)