2023-yilda umumiy qiymati 8 mlrd dollarlik 300 dan ziyod loyiha ishga tushiriladi va yana 40 ta yangi yirik loyiha boshlanadi

Ayni vaqtda O‘zbekiston prezidenti Shavkat Mirziyoyev Oliy Majlisga murojaatnoma yo‘llamoqda. Bu haqda “Daryo” muxbiri xabar berdi.

Davlat rahbari 2023-yilda umumiy qiymati 8 milliard dollarlik 300 dan ziyod loyihani ishga tushirish va yana 40 ta yangi yirik loyiha boshlanishini aytdi.

“Misol uchun, “Yoshlik” mis konini o‘zlashtirishning birinchi bosqichi yakuniga yetkazilib, 60 million tonna rudani qayta ishlash quvvatiga ega 3-misni boyitish fabrikasi ishga tushadi. Bu orqali, Olmaliq kombinatining rudani qayta ishlash quvvati hozirgi 40 milliondan 100 million tonnaga yetadi. Shu bilan birga, Olmaliqda 4-misni boyitish fabrikasi va Mis eritish zavodi loyihalari boshlanadi. Navoiydagi Pistali konida 4 million tonna oltin rudasini qayta ishlash majmuasining qurilishi yakunlanadi”, — dedi Shavkat Mirziyoyev.

Prezident 2023-yili mingga yaqin korxonalar savdoga chiqarilishini ta’kidladi.

“Metallurgiya sohasida amalga oshirilayotgan katta dasturlarimiz, besh yildan keyin misni 3 barobarga (500 ming tonna), oltinni esa, yiliga 150 tonnagacha oshirish imkonini beradi. Kimyo, avtomobilsozlik va qishloq xo‘jaligi mashinasozligida ham katta-katta loyihalar ishga tushiriladi. Shu bilan birga, faol investitsiyalar jalb qilishda xususiylashtirish va davlat-xususiy sherikchilik imkoniyatlaridan to‘liq va samarali foydalanish zarur. Kelasi yili “katta xususiylashtirish”ni boshlaymiz, mingga yaqin korxonalar savdoga chiqariladi”, — dedi prezident.

Ta’kidlanishicha, 2023-yilda eng yirik 10 ta kompaniyalar va tijorat banklar aksiyalari aholi uchun ochiq va shaffof savdoga chiqariladi.

“Bugun ko‘nglimdagi bitta niyatimni sizlarga ochiq aytmoqchiman. Mening katta niyatim – yurtdoshlarimiz orasida yuz minglab mulkdorlar, aksiyadorlar paydo bo‘lsin. Odamlarimiz o‘z omonatlarini investitsiya qilib, yuqori daromadlarga ega bo‘lsin. Shuning uchun, topshiriq berdim. Keyingi yilda eng yirik 10 ta kompaniyalar va tijorat banklarimizni aksiyalari o‘z aholimiz uchun ochiq va shaffof savdoga chiqariladi. Bu chinakam xalq IPOsi bo‘lishiga ishonaman. Shu borada ilgari ham aytgan gapimni takrorlashni o‘rinli, deb bilaman: xalq boy bo‘lsa, davlat ham boy va qudratli bo‘ladi”, — dedi Mirziyoyev.