“2023-yili qo‘shimcha 140 ta oilaviy shifokor punkti va poliklinikalari tashkil etiladi” — Shavkat Mirziyoyev

Ayni vaqtda O‘zbekiston prezidenti Shavkat Mirziyoyev Oliy Majlisga murojaatnoma yo‘llamoqda. Bu haqda “Daryo” muxbiri xabar berdi.

Davlat rahbari kelasi ikki yilda har bir oilaviy poliklinika va shifokor punktiga eng kerakli uskuna va jihozlar yetkazib berilishi, ekspress laboratoriyalar to‘liq yangilanishini ta’kidladi.

“Keyingi yili qo‘shimcha 140 ta oilaviy shifokor punkti va poliklinikalari, 520 ta olis va chekka mahallada ixcham tibbiyot punktlari tashkil etiladi. Shu bilan birga, onalar va bolalar salomatligini muhofaza qilish bo‘yicha uch yillik katta dastur amalga oshiriladi. Barcha tug‘ruq komplekslari to‘liq ta’mirlanadi va jihozlanadi, o‘rinlar soni 35 foizga ko‘paytiriladi”, — dedi prezident.

Shavkat Mirziyoyevning aytishicha, O‘zbekistonda 15 mingga yaqin onkologik bemorlar nur yordamida davolanishga muhtoj.

”Shu bois, kelasi yilda Samarqand, Farg‘ona va Xorazmda, xususiy sherikchilik asosida Radiologiya markazlarini tashkil etish loyihalarini boshlaymiz”, — dedi Mirziyoyev.

Eslatib o‘tamiz, “Birlamchi tibbiy-sanitariya yordamini aholiga yaqinlashtirish va tibbiy xizmatlar samaradorligini oshirish bo‘yicha qo‘shimcha chora-tadbirlar to‘g‘risida”gi prezident qaroriga ko‘ra, 2023-yil 1-yanvardan boshlab joylardagi oilaviy poliklinika filiallari negizida oilaviy shifokor punktlari tashkil etiladi.