Jahon banki O‘zbekistonda iqtisodiy va ijtimoiy islohotlarni davom ettirishni qo‘llab-quvvatlovchi “O‘zbekistonning iqtisodiy va ijtimoiy o‘zgarishlarini rivojlantirish siyosati bo‘yicha operatsiya”ni ma’qulladi. Bu haqda bank matbuot xizmati xabar bermoqda.
Ushbu islohotlar bozor institutlarini mustahkamlash va barcha fuqarolarning iqtisodiy o‘sish afzalliklarida ishtirok etishini ta’minlash orqali xususiy sektor boshqaruvidagi iqtisodiyotga inklyuziv o‘tishni qo‘llab-quvvatlashga yordam beradi.
Jahon banki tomonidan O‘zbekistonga moliyaviy ko‘mak ko‘rinishida 470 million dollar miqdoridagi o‘ta imtiyozli kreditlar, 480 million dollarlik arzon kreditlar taqdim qilinmoqda.
“Jahon miqyosidagi hamda Yevropa va Markaziy Osiyo mintaqasidagi murakkab vaziyatga qaramay, O‘zbekiston muhim islohotlarga sodiq qolayotgani quvonarlidir”, — deydi Jahon bankining Markaziy Osiyo bo‘yicha mintaqaviy direktori Tatyana Proskuryakova.
Uning so‘zlariga ko‘ra, ushbu siyosat amaliyoti O‘zbekistonga inklyuziv va jonli bozor iqtisodiyotini rivojlantirishga ko‘maklashish maqsadida 2017-yildan beri Jahon banki tomonidan ko‘rsatilayotgan keng ko‘lamli moliyaviy va texnik yordamga asoslanadi.
Jahon banki ajratayotgan mablag‘ quyidagi islohotlarni qo‘llab-quvvatlaydi:
- ijtimoiy himoya tizimining, ayniqsa, kam ta’minlangan va ijtimoiy himoyaga muhtoj oilalarning faoliyatini yaxshilash maqsadida yangi Milliy ijtimoiy himoya strategiyasini ishlab chiqish;
- xususiy sektor xodimlariga davlat tomonidan moliyalashtiriladigan onalik nafaqalarini kengaytirish, bu esa ish joylarida ayollarga nisbatan kamsitishlarni kamaytiradi;
- xususiy sektorda ishbilarmonlik muhitini yaxshilash uchun davlat korxonalarini xususiylashtirish, raqobat va to‘lovga layoqatsizlikni tartibga solish bo‘yicha yangi qonun hujjatlarini ishlab chiqish;
- O‘zbekiston mobil telekommunikatsiyalarida xususiy ishtirokni oshirish va raqobatni kuchaytirish;
- kichik biznes uchun moliyalashtirish imkoniyatlarini kengaytirish maqsadida nobank kredit tashkilotlarini chuqurlashtirish va kengaytirish hamda ularning xizmat ko‘rsatish sifatini yaxshilash;
- Davlat korxonalari faoliyatini moliyaviy nazorat va moliyaviy intizomni oshirish.
Ta’kidlanishicha, operatsiya global iqtisodiy noaniqliklar kuchaygan, moliyaviy bozorlar keskinlashgan va global oziq-ovqat va yoqilg‘i narxlarining ko‘tarilishi davrida hukumat budjetini moliyaviy qo‘llab-quvvatlaydi.
2022-yil dekabr holatiga ko‘ra, Jahon bankining O‘zbekistondagi mamlakat dasturi 27 ta loyihani o‘z ichiga oladi.
Avvalroq Jahon banki O‘zbekistonda o‘rmonlarni tiklash uchun 142 mln dollarlik kredit ajratishi haqida xabar berilgan edi.
Izoh (0)