Жаҳон банки Ўзбекистонда иқтисодий ва ижтимоий ислоҳотларни давом эттиришни қўллаб-қувватловчи «Ўзбекистоннинг иқтисодий ва ижтимоий ўзгаришларини ривожлантириш сиёсати бўйича операция»ни маъқуллади. Бу ҳақда банк матбуот хизмати хабар бермоқда.
Ушбу ислоҳотлар бозор институтларини мустаҳкамлаш ва барча фуқароларнинг иқтисодий ўсиш афзалликларида иштирок этишини таъминлаш орқали хусусий сектор бошқарувидаги иқтисодиётга инклюзив ўтишни қўллаб-қувватлашга ёрдам беради.
Жаҳон банки томонидан Ўзбекистонга молиявий кўмак кўринишида 470 миллион доллар миқдоридаги ўта имтиёзли кредитлар, 480 миллион долларлик арзон кредитлар тақдим қилинмоқда.
«Жаҳон миқёсидаги ҳамда Европа ва Марказий Осиё минтақасидаги мураккаб вазиятга қарамай, Ўзбекистон муҳим ислоҳотларга содиқ қолаётгани қувонарлидир», — дейди Жаҳон банкининг Марказий Осиё бўйича минтақавий директори Татяна Проскурякова.
Унинг сўзларига кўра, ушбу сиёсат амалиёти Ўзбекистонга инклюзив ва жонли бозор иқтисодиётини ривожлантиришга кўмаклашиш мақсадида 2017 йилдан бери Жаҳон банки томонидан кўрсатилаётган кенг кўламли молиявий ва техник ёрдамга асосланади.
Жаҳон банки ажратаётган маблағ қуйидаги ислоҳотларни қўллаб-қувватлайди:
- ижтимоий ҳимоя тизимининг, айниқса, кам таъминланган ва ижтимоий ҳимояга муҳтож оилаларнинг фаолиятини яхшилаш мақсадида янги Миллий ижтимоий ҳимоя стратегиясини ишлаб чиқиш;
- хусусий сектор ходимларига давлат томонидан молиялаштириладиган оналик нафақаларини кенгайтириш, бу эса иш жойларида аёлларга нисбатан камситишларни камайтиради;
- хусусий секторда ишбилармонлик муҳитини яхшилаш учун давлат корхоналарини хусусийлаштириш, рақобат ва тўловга лаёқатсизликни тартибга солиш бўйича янги қонун ҳужжатларини ишлаб чиқиш;
- Ўзбекистон мобил телекоммуникацияларида хусусий иштирокни ошириш ва рақобатни кучайтириш;
- кичик бизнес учун молиялаштириш имкониятларини кенгайтириш мақсадида нобанк кредит ташкилотларини чуқурлаштириш ва кенгайтириш ҳамда уларнинг хизмат кўрсатиш сифатини яхшилаш;
- Давлат корхоналари фаолиятини молиявий назорат ва молиявий интизомни ошириш.
Таъкидланишича, операция глобал иқтисодий ноаниқликлар кучайган, молиявий бозорлар кескинлашган ва глобал озиқ-овқат ва ёқилғи нархларининг кўтарилиши даврида ҳукумат бюджетини молиявий қўллаб-қувватлайди.
2022 йил декабрь ҳолатига кўра, Жаҳон банкининг Ўзбекистондаги мамлакат дастури 27 та лойиҳани ўз ичига олади.
Аввалроқ Жаҳон банки Ўзбекистонда ўрмонларни тиклаш учун 142 млн долларлик кредит ажратиши ҳақида хабар берилган эди.
Изоҳ (0)