АҚШ Конгресси 2023 йил учун давлат ҳисобидан 1,7 триллион доллар маблағ ажратиш тўғрисидаги қонун лойиҳасини тақдим этди. Шундан 44,9 миллиард доллари Украина ва НАТО иттифоқчиларига ёрдам учун мўлжалланган, деб ёзмоқда Reuters.
Агентликнинг таъкидлашича, 1,7 триллион долларлик молиялаштириш рекорд даражадаги ҳарбий харажатларни ўз ичига олади ва 2022 йилги қарийб 1,5 триллион доллардан сезиларли даражада кўп.
«Қонун лойиҳаси Украина ва НАТО иттифоқчиларига 44,9 миллиард доллар миқдоридаги қўшимча фавқулодда ёрдамни ўз ичига олади», — дейилади хабарда.
Сенат ва Вакиллар палатаси раҳбарлари қонун лойиҳасини қабул қилиб, ҳафта охиригача АҚШ президенти Жо Байденга имзолаш учун юборишни режалаштирмоқда. Бир неча ой давомида демократлар ва республикачилар ҳарбий ва ноҳарбий дастурларга қанча пул сарфлаш кераклиги ҳақида баҳслашган.
Кейинги ҳафта АҚШда 2023-молия йили учун рекорд даражада — 858 миллиард долларлик мудофаа бюджети лойиҳаси ҳам қабул қилинади, ўтган йили бу сумма 740 миллиард долларни ташкил қилганди.
Эслатиб ўтамиз, ноябрь ойи охирида Байден Давлат департаменти раҳбари Энтони Блинкенга Украинани ҳарбий қўллаб-қувватлаш учун қўшимча 400 миллион долларгача маблағ юборишни топширганди.
Изоҳ (0)