Qashqadaryo viloyatining Yakkabog‘ tumanida 45 yoshli fuqaro o‘z joniga qasd qilgani haqida xabar berilgandi. Viloyat prokuraturasi holat yuzasidan tergovga qadar tekshiruv harakati olib borilayotganini ma’lum qildi.
Aniqlanishicha, 16-dekabr kuni Yakkabog‘ tumani, Chimqo‘rg‘on qishlog‘ida yashagan 1977-yilda tug‘ilgan erkak o‘zi yashab kelgan hovlining molxonasida o‘zini-o‘zi osib vafot etgan.
Bu haqda jamoatchilikka ma’lumot bergan mahalliy blogerlar ishda marhumga sinfdosh bo‘lgan 94-maktab direktorining “qo‘li borligi”ni yozgach, “Daryo” muxbiri ushbu vaziyatga aniqlik kiritish maqsadida ushbu maktab direktori Mahmud Rahmatov bilan suhbatlashgandi. U o‘z joniga qasd qilgan fuqaro bilan janjal bo‘lganini, ammo u o‘zini o‘ldirgan kuni shifoxonada bo‘lganini aytgandi.
“O‘sha kuni maktabdan chiqib ketayotganimda marhum sinfdoshim yo‘limni to‘sib meni haqorat qildi. Mast bo‘lganligi sababli avvaliga e’tibor bermadim. Ammo u onamni, singlimni haqorat qilib so‘kingach, u bilan janjallashdim. U meni urgani uchun o‘sha joyda hushimni yo‘qotganman. Keyin o‘zimga kelib, uyga qaytdim va shifoxonaga murojaat qildim. O‘sha kuni tuman tibbiyot birlashmasining shoshilinch yordam bo‘limiga yotqizildim. Sinfdoshim o‘z joniga qasd qilgan kuni, men shifoxonada bo‘lganman, — degan u.
Prokuratura bergan ma’lumotga ko‘ra, marhumning o‘lim sababiga aniqlik kiritish maqsadida sud-tibbiy ekspertizasi tayinlangan. Holat bo‘yicha Yakkabog‘ tumani prokuraturasi tomonidan tergovga qadar tekshiruv harakati olib borilmoqda.
Izoh (0)