Qashqadaryo viloyatining Yakkabog‘ tumanida 45 yoshli fuqaro o‘z joniga qasd qilgani xabar berildi. Bu haqda jamoatchilikka ma’lumot bergan mahalliy blogerlar ishda tumandagi 94-maktab direktorining “qo‘li borligi”ni yozmoqda.
“Daryo” muxbiri ushbu vaziyatga aniqlik kiritish maqsadida 94-maktab direktori bilan suhbatlashdi.
Tumanda kimligi ham noma’lum bo‘lgan bloger menga shunday ayb qo‘yyapti. Aslida voqea ro‘y bergan kuni men shifoxonada bo‘lganman, — deydi Yakkabog‘ tumanidagi 94-maktab direktori Mahmud aka Rahmatov.
Direktorning aniqlik kiritishicha, marhum va uning o‘rtasida janjal bo‘lgan.
O‘sha kuni maktabdan chiqib ketayotganimda marhum sinfdoshim yo‘limni to‘sib meni haqorat qildi. Mast bo‘lganligi sababli avvaliga e’tibor bermadim. Ammo u onamni, singlimni haqorat qilib so‘kingach, u bilan janjallashdim. U meni urgani uchun o‘sha joyda hushimni yo‘qotganman. Keyin o‘zimga kelib, uyga qaytdim va shifoxonaga murojaat qildim. O‘sha kuni tuman tibbiyot birlashmasining shoshilinch yordam bo‘limiga yotqizildim. Sinfdoshim o‘z joniga qasd qilgan kuni, men shifoxonada bo‘lganman, — deydi maktab direktori.
Mahmud Rahmatovning aytishicha, marhum o‘limidan bir kun avval shifoxonaga kelib, qilgan ishi uchun undan uzr so‘ragan.
Haqiqatan ham rais va men, marhumning taklifiga ko‘ra shifoxonaga borgandik. Marhum sinfdoshi Mahmud akadan uzr so‘ramoqchiligini aytdi va bizni olib shifoxonaga ham borgandi, — deydi maktab direktorining gapini tasdiqlagan hokim yordamchisi Bahrom Boboqulov.
Bahrom Boboqulovning qo‘shimcha qilishicha, bu voqea bo‘yicha MFY raisi va hokim yordamchisi tuman prokuraturasiga chaqirtirilib, tergov ham qilingan.
“Daryo” voqea yuzasidan viloyat prokuraturasi axborot xizmatiga murojaat qilib, qo‘shimcha axborot so‘radi. Mas’ul ayni paytda unda bu haqda axborot yo‘qligini tez orada bu xususida batafsil ma’lumot berilishini aytdi.
Mavzuga doir:
Izoh (0)