Қашқадарё вилоятининг Яккабоғ туманида 45 ёшли фуқаро ўз жонига қасд қилгани ҳақида хабар берилганди. Вилоят прокуратураси ҳолат юзасидан терговга қадар текширув ҳаракати олиб борилаётганини маълум қилди.
Аниқланишича, 16 декабрь куни Яккабоғ тумани, Чимқўрғон қишлоғида яшаган 1977 йилда туғилган эркак ўзи яшаб келган ҳовлининг молхонасида ўзини-ўзи осиб вафот этган.
Бу ҳақда жамоатчиликка маълумот берган маҳаллий блогерлар ишда марҳумга синфдош бўлган 94-мактаб директорининг «қўли борлиги»ни ёзгач, «Дарё» мухбири ушбу вазиятга аниқлик киритиш мақсадида ушбу мактаб директори Маҳмуд Раҳматов билан суҳбатлашганди. У ўз жонига қасд қилган фуқаро билан жанжал бўлганини, аммо у ўзини ўлдирган куни шифохонада бўлганини айтганди.
«Ўша куни мактабдан чиқиб кетаётганимда марҳум синфдошим йўлимни тўсиб мени ҳақорат қилди. Маст бўлганлиги сабабли аввалига эътибор бермадим. Аммо у онамни, синглимни ҳақорат қилиб сўкингач, у билан жанжаллашдим. У мени ургани учун ўша жойда ҳушимни йўқотганман. Кейин ўзимга келиб, уйга қайтдим ва шифохонага мурожаат қилдим. Ўша куни туман тиббиёт бирлашмасининг шошилинч ёрдам бўлимига ётқизилдим. Синфдошим ўз жонига қасд қилган куни, мен шифохонада бўлганман, — деган у.
Прокуратура берган маълумотга кўра, марҳумнинг ўлим сабабига аниқлик киритиш мақсадида суд-тиббий экспертизаси тайинланган. Ҳолат бўйича Яккабоғ тумани прокуратураси томонидан терговга қадар текширув ҳаракати олиб борилмоқда.
Изоҳ (0)