“Daryo” internet-nashri Toshkent shahri hokimligi qoshidagi Jamoatchilik kengashi bilan birgalikda “Mahalla. Muammo. Mulohaza” loyihasini taqdim etib kelmoqda. Loyihaning 11-soni mavzusi “Tazyiq va zo‘ravonlik — nomardlik” bo‘lib, dastur mehmoni sifatida iqtisod fanlari doktori, professor Barnogul Sanakulova taklif etildi.
Men mahallalarga yoshi ulug‘, nuroniy insonlarni rais qilib qo‘yishni yoqlamayman. Yaxshisi, ularni ishlatmasdan, dam olishi uchun imkoniyat yarataylik, duo uchun “foydalanaylik”. Mahallaga kuch-g‘ayratga to‘la, shijoatli, yangiliklarga tashna, izlanishdan toymaydigan va kerak bo‘lsa 24 soat ijtimoiy tarmoqda o‘tirib, mahalladoshlari yozayotgan muammolarni kuzatib, ma’lumot yig‘adigan yoshlar bosh bo‘lishini xohlardim.
Davlat, bugun o‘zining yomon ish beruvchi, yomon ijtimoiy xodim, zo‘ravonlikka qarshi yomon kurashchi ekanini tushunib yetishi bilan, bu vazifani yaxshi bajaruvchilar qo‘liga topshirib, faqatgina nazorat, monitoring qilish va statistikani taqdim etish rolini bajarishi kerak. Chunki statistikaning odil va to‘g‘ri bo‘lishi juda ahamiyatli.Rais o‘z mahallasidagi har bir insonning ijtimoiy-iqtisodiy, moliyaviy holati to‘g‘risida ma’lumotlarga ega bo‘lishi kerak. Biz bugun shunaqa davrda yashayapmizki, agar hammasi to‘g‘ri dasturlashtirilsa, besh daqiqada hamma ma’lumotni qo‘lga kiritsa bo‘ladi.
Yaqinda vodiylik yolg‘iz ona qo‘lida voyaga yetgan 16 yoshli bolaning o‘limi haqida ijtimoiy tarmoqlardagi muhokamalarni kuzatib, Yoshlar ishlari agentligi raisiga murojaat qildim, yolg‘iz ona tarbiyalayotgan o‘g‘il bolalar sonini bilish-bilmasligi haqida so‘radim. Chunki bunday holatlar yuzaga kelmasligi uchun ularning sonini, manzilini bilish muhim. Men so‘ragan ma’lumotlarni bir haftada topib berishdi. Algoritmik nuqtayi nazardan, yaxshi dasturchi bo‘lsa, platformadan bu ma’lumotni uzog‘i bilan 2 soatda yig‘ib bera olishi kerak edi.Muammo bilan ishlayapmiz, deymiz-u, uning manzilini bilmaymiz. Maqsadli, manzilli bo‘lmagandan so‘ng, korrupsiya, pulni “yeyish” holatlari paydo bo‘lishi tabiiy, – ta’kidlaydi iqtisod fanlari doktori.
Ko‘rsatuvni to‘liq tarzda “Daryo”ning YouTube’dagi sahifasi orqali tomosha qilish mumkin.
Izoh (0)