“Daryo” internet-nashri Toshkent shahri hokimligi qoshidagi Jamoatchilik kengashi bilan birgalikda “Mahalla. Muammo. Mulohaza” loyihasini taqdim etib kelmoqda. Loyihaning 11-soni mavzusi “Tazyiq va zo‘ravonlik — nomardlik” bo‘lib, dastur mehmoni sifatida iqtisod fanlari doktori, professor Barnogul Sanakulova taklif etildi.
Professor orzudagi unikal tizim – mahalla mavzusiga to‘xtalar ekan, o‘zining misolida mahalla raisi qanday tartibda ishlashi kerakligi borasida takliflari bilan bo‘lishdi.
Ijtimoiy himoya oladiganlar qancha kam bo‘lsa, mahallaga shuncha yaxshi. Chunki shunda uning budjeti boshqa yaxshi ishlarga sarflash uchun tayyor turadi. Asosiy mablag‘ ijtimoiy, moddiy yordam ko‘rsatish emas, obodonlashtirish, qurilish, “Yashil makon” singari islohotlarga yo‘naltiriladi. Masalan, “Yashil makon” bilan 2030-yilgacha boramiz, ekologik vaziyat dolzarb tusga kirgan. Bugun bir martalik gullar ekish emas, uylar orasida kichik-kichik bog‘lar yaratishga ehtiyoj yuqori.Agar mahalla raisi bo‘lganimda, shu yerning o‘zida yashovchi bog‘dorchilik, yershunoslikdan xabari bo‘lgan odamlardan kichik guruh tuzib, ularni ma’lum muddat o‘qitib, malakasini oshirardim. Natijada “Yashil makon” loyihasida ayrim hokimlarga tegishli soxta MCHJlar emas, mana shunday bog‘bonlar guruhiga buyurtma berardim. Tasavvur qiling, o‘zi yashayotgan mahalladagi bog‘ni sidqidildan parvarishlagan yigit mehnati uchun pul ham oladi.
2030-yilgacha ushbu loyihaga davlat budjetidan, turli tashkilotlardan ajratilgan 7 yillik mablag‘ tayyor, faqat undan samarali foydalanilsa, bas. Shu mahalla odami o‘zi yashaydigan hududda ishlasa, tozaligiga ham e’tiborli bo‘ladi, birov iflos qilib ketishiga yo‘l qo‘ymaydi, xodimlarning mehnatini ham qadrlaydi.Eng muhimi, ishda kamchilik va xatolar bo‘lsa, jamiyatning befarq bo‘lmagan biror fuqarosi qaysi bog‘bonni borib “bo‘g‘ish”ni, aybdorni qayerdan topishni biladi.
Ko‘z ko‘zga tushishi, andisha singari qadriyatlar ham bu jihatdan yaxshi ta’sir ko‘rsatadi. Shundagina, haqiqatan, biz orzu qiladigan mahalla shakllanadi, korrupsiyadan xoli tizimga ega bo‘lamiz.
Mahalla raisi noqonuniy ishlasa, talablarimizga javob berolmasa, uni to‘ntarib tashlab, o‘rniga arzirli, munosib bir yigit yoki qizni qo‘yamiz va u o‘z mahallasi oldida har yillik daromad va xarajatlari bo‘yicha hisob beradi. Aslida yechim shunday oddiy va sodda, – deydi iqtisodchi.
Ko‘rsatuvni to‘liq tarzda “Daryo”ning YouTube’dagi sahifasi orqali tomosha qilish mumkin.
Izoh (0)