Namanganda bir hafta davomida elektr va gaz tarmoqlariga noqonuniy ulanish bilan bog‘liq 230 dan ortiq holat aniqlandi. Bu haqda viloyat hokimi Shavkat Abdurazzaqov ma’lum qildi, deya xabar beradi “Daryo” muxbiri Azizbek Abduvaliyev.
Aniqlangan holatlar bo‘yicha 13 ta jinoyat ishi qo‘zg‘atilgan.
“Oxirgi ikki yil davomida ham shu yo‘nalishda bunchalik jinoyat ishlari ochilmagan edi. Ishni ichiga kirganimizdan so‘ng haqiqiy vaziyat namoyon bo‘lyapti. Bunga ertaroq kirishish mumkin edi, chunki bu sohalarning o‘zini alohida nazorat qiluvchi inspeksiyalari bor”, — dedi Namangan viloyati hokimi mutasaddilar bilan o‘tkazilgan muloqot davomida.
Yig‘ilishda hududlardagi yangilanishi kerak bo‘lgan transformatorlar, aholiga qo‘shimcha berilishi zarur bo‘lgan gaz ballonlari, ko‘mir ta’minotidagi muammolar haqida so‘z bordi. Holatni qisqa muddatda o‘nglash yuzasidan aniq ko‘rsatma va vazifalar berildi.
Izoh (0)