«Дарё» интернет-нашри Тошкент шаҳри ҳокимлиги қошидаги Жамоатчилик кенгаши билан биргаликда «Маҳалла. Муаммо. Мулоҳаза» лойиҳасини тақдим этиб келмоқда. Лойиҳанинг 11-сони мавзуси «Тазйиқ ва зўравонлик — номардлик» бўлиб, дастур меҳмони сифатида иқтисод фанлари доктори, профессор Барногул Санакулова таклиф этилди.
Мен маҳаллаларга ёши улуғ, нуроний инсонларни раис қилиб қўйишни ёқламайман. Яхшиси, уларни ишлатмасдан, дам олиши учун имконият яратайлик, дуо учун «фойдаланайлик». Маҳаллага куч-ғайратга тўла, шижоатли, янгиликларга ташна, изланишдан тоймайдиган ва керак бўлса 24 соат ижтимоий тармоқда ўтириб, маҳалладошлари ёзаётган муаммоларни кузатиб, маълумот йиғадиган ёшлар бош бўлишини хоҳлардим.
Давлат, бугун ўзининг ёмон иш берувчи, ёмон ижтимоий ходим, зўравонликка қарши ёмон курашчи эканини тушуниб етиши билан, бу вазифани яхши бажарувчилар қўлига топшириб, фақатгина назорат, мониторинг қилиш ва статистикани тақдим этиш ролини бажариши керак. Чунки статистиканинг одил ва тўғри бўлиши жуда аҳамиятли.Раис ўз маҳалласидаги ҳар бир инсоннинг ижтимоий-иқтисодий, молиявий ҳолати тўғрисида маълумотларга эга бўлиши керак. Биз бугун шунақа даврда яшаяпмизки, агар ҳаммаси тўғри дастурлаштирилса, беш дақиқада ҳамма маълумотни қўлга киритса бўлади.
Яқинда водийлик ёлғиз она қўлида вояга етган 16 ёшли боланинг ўлими ҳақида ижтимоий тармоқлардаги муҳокамаларни кузатиб, Ёшлар ишлари агентлиги раисига мурожаат қилдим, ёлғиз она тарбиялаётган ўғил болалар сонини билиш-билмаслиги ҳақида сўрадим. Чунки бундай ҳолатлар юзага келмаслиги учун уларнинг сонини, манзилини билиш муҳим. Мен сўраган маълумотларни бир ҳафтада топиб беришди. Алгоритмик нуқтаи назардан, яхши дастурчи бўлса, платформадан бу маълумотни узоғи билан 2 соатда йиғиб бера олиши керак эди.Муаммо билан ишлаяпмиз, деймиз-у, унинг манзилини билмаймиз. Мақсадли, манзилли бўлмагандан сўнг, коррупция, пулни «ейиш» ҳолатлари пайдо бўлиши табиий, – таъкидлайди иқтисод фанлари доктори.
Кўрсатувни тўлиқ тарзда «Дарё»нинг YouTube’даги саҳифаси орқали томоша қилиш мумкин.
Изоҳ (0)