“Daryo” internet-nashri Toshkent shahri hokimligi qoshidagi Jamoatchilik kengashi bilan birgalikda “Mahalla. Muammo. Mulohaza” loyihasini taqdim etib kelmoqda. Loyihaning 11-soni mavzusi “Tazyiq va zo‘ravonlik — nomardlik” bo‘lib, dastur mehmoni sifatida iqtisod fanlari doktori, professor Barnogul Sanakulova taklif etildi.
Barnogul Sanakulova zo‘ravonlik mavzusida faqat ayollarga e’tibor qaratilib, erkaklar haqida gapirilmayotgani, vaholanki, erkaklar zo‘ravonligi ham chuqur o‘rganilishi kerak bo‘lgan masala ekanligiga to‘xtaldi.
Erkaklarga nisbatan bo‘layotgan zo‘ravonlik masalasini ko‘tarib chiqish va buni fundamental tahlil qilishimiz kerak. Chunki bizda erkak kishi kimgadir muammosini aytishi uyat hisoblanadi, erkak mard bo‘lishi kerak, siqilmasligi kerak degan stereotiplarni yaratib qo‘yib, ularni eshitayotganimiz ham yo‘q. Ularning orasida ayollar tazyiqi ostida zo‘ravonlikka uchrayotganlari bo‘lishi mumkin.
Misol uchun, rafiqasi er kishining hamiyati yuqoriligini bila turib, uni boshqalar bilan solishtiradi, “Menga hech nima olib berolmading, hayotim sen bilan bog‘langanidan buyon ro‘shnolik ko‘rmadim”, deyaverishidan erkak ruhiy zo‘ravonlikka uchrayapti. Muttasil ta’na-dashnom eshitgan erkak o‘zini kamsitilgan, ruhan ezilgan his qiladi, qanchalik omadsiz ekanligini o‘ylab kun o‘tkazadi. Lekin bu haqda gapirolmaydi, agar gapirsa, erkak ham shunday bo‘ladimi, deya uyaltiramiz, gapirolmasa, o‘z vazifasini bajarmayapti, deb yana malomat qilamiz.
Balki erkakning ko‘p pul topolmayotgani, oilasini yetarlicha ta’minlab berolmayotganining sababi uning bolaligiga, ota-onasiga borib taqalar. O‘zini boshqa sohada ko‘rsatoladigan yigitni majburan, pul bilan boshqa sohaga o‘qishga kiritib qo‘yishgandir-u, moliyaviy “homiy” – ota-ona vafot etgach, u o‘z yo‘lini yo‘qotib qo‘ygandir. 30 yoshli mana shu yigit necha yillik zo‘ravonlikning qurboni va mahsuloti hisoblanadi. Agar bugun shu mavzuni gapirmasak, yechim topmasak, kelajakda xuddi shunday minglab, millionlab fuqarolarga ega bo‘lib qolamiz, – deydi professor.
Ko‘rsatuvni to‘liq tarzda “Daryo”ning YouTube’dagi sahifasi orqali tomosha qilish mumkin.
Izoh (0)