Yevropa Ittifoqi davlatlari 12-dekabr kuni Bryusselda bo‘lib o‘tadigan tashqi ishlar vazirlarining uchrashuvi oldidan Rossiyaga qarshi sanksiyalarning to‘qqizinchi paketi bo‘yicha kelisha olmadi, muhokama davom etmoqda. Bu haqda Yevropa diplomatiyasi rahbari Jozep Borrel ma’lum qildi.
“Yevropa Ittifoqi kengashining ushbu yig‘ilishi juda uzoq va qiyin bo‘ladi. Kun tartibida Rossiyaga qarshi sanksiyalarning to‘qqizinchi paketini tasdiqlash bor. Biz hali ham muzokaralar jarayonidamiz va buni hali tugatmadik”, — dedi u.
Borrel sanksiyalar taklifi “yakuniy qaror emas, faqat taklif” ekani va u muhokama qilinishi kerakligini ta’kidladi. “Hali kelishib olinishi kerak bo‘lgan bir qancha masalalar bor”, — deya qo‘shimcha qildi diplomat.
Borrel, shuningdek, norozilik namoyishlari va “Rossiyaga qurol yetkazib berish” bilan bog‘liq vaziyat tufayli Eronga qarshi yangi sanksiyalar qo‘llanilishini ma’lum qildi.
Rossiyaning Ukrainadagi bosqini boshlanganidan beri YI allaqachon sakkizta sanksiya paketini joriy qilgan. Ular orasida Rossiya banklari, ishbilarmonlariga nisbatan cheklovlar, ko‘mir importini taqiqlash, neft embargosi, eksport cheklovlari va hokazolar bor. Politico nashrining yozishicha, to‘qqizinchi paket doirasidagi asosiy chora YI sanksiyalariga duchor bo‘lgan shaxslar ro‘yxatini keng miqyosda kengaytirish bo‘lishi mumkin.
Mavzuga doir: YI Turkiyani Rossiyaga qarshi sanksiyalarga rioya qilishga chaqirdi
Izoh (0)