Shavkat Mirziyoyevga 16-dekabr kuni temiryo‘l sohasidagi yirik xalqaro loyihalarning amaldagi holati va kelgusi rejalar yuzasidan axborot berildi. Bu haqda prezident matbuot xizmati xabar qildi.
Ta’kidlanishicha, mamlakat uchun transport yo‘laklarini diversifikatsiya qilish, jahon bozorlariga tez va erkin chiqish juda muhim. Shu bois davlat rahbari xalqaro anjumanlarda bu masalani ko‘tarib, amaliy tashabbuslarni ilgari surmoqda. Qo‘shni va manfaatdor mamlakatlar bilan loyihalar jadallashtirilmoqda.
Ulardan biri 454 kilometrlik O‘zbekiston—Qirg‘iziston—Xitoy temiryo‘li qurilishidir. 14-sentabrda Samarqandda bu loyiha bo‘yicha uch tomonlama anglashuv memorandumi imzolangan edi. Noyabr oyida Xitoyning “Birinchi loyiha-tadqiqot instituti” tomonidan dala tadqiqot ishlari olib borildi.
Hisobot davomida rejadagi ishlar to‘g‘risida ham aytib o‘tildi. Xususan, Bishkek shahrida loyiha ofisi tashkil etiladi. Loyihani boshqarish uslubi va tartibi muhokama qilinadi. Xalqaro moliya tashkilotlari bilan muzokaralar o‘tkaziladi. Umuman, 1-iyungacha loyihaning texnik-iqtisodiy asosini tayyorlash rejalashtirilgan.
Sohadagi yana bir mintaqaviy loyiha Termiz—Mozori-Sharif—Kobul—Peshovar temir yo‘lidir. Afg‘onistondagi murakkab vaziyatga qaramay, bu borada ham sezilarli siljishlar bor. Xususan, 2022-yil yozda Afg‘onistonning Mozori-Sharif shahridan Pokistonning Torxam shahrigacha tadqiqot ekspeditsiyasi o‘tkazildi.
Qayd etilganidek, loyiha doirasida 765 kilometr temiryo‘l qurilishi mo‘ljallanmoqda. 2023-yilda bu bo‘yicha loyiha ofisi tashkil etish, xalqaro konsalting kompaniyasini jalb qilish, investorlar bilan muzokaralar o‘tkazish rejalashtirilgan. Shulardan kelib chiqib, loyihaning texnik-iqtisodiy asosi tayyorlanadi.
Shavkat Mirziyoyev bu rejalarni ma’qullab, hamkor mamlakatlar bilan “yo‘l xaritalari” ishlab chiqish bo‘yicha ko‘rsatmalar berdi. Bu ikki temiryo‘lning qurilishi O‘zbekistonning transport kommunikatsiyalarini diversifikatsiya qilib, logistika imkoniyatlarini karrasiga kengaytiradi.
Izoh (0)