Guruch va sabzi qimmatlagan, shakar narxi tushgan: O‘zbekiston bozorlarida oziq-ovqat narxlari e’lon qilindi

Davlat statistika qo‘mitasi O‘zbekiston hududiy-markaziy dehqon bozorlarida 14-dekabr kuni o‘tkazilgan kuzatuv natijalari bo‘yicha alohida turdagi oziq-ovqat mahsulotlarining minimal-maksimal narxlari to‘g‘risida ma’lumot berdi.

Suyakli mol go‘shti

48 000 so‘mdan 78 000 so‘mgacha (kg)

Kuzatuv natijasiga ko‘ra, 1 kg suyakli mol go‘shtining minimal narxi Navoiy shahrining “Saxovat bozori”dagi arzonlashtirilgan go‘sht rastalarida qayd etilgan (48 000 so‘m).

Suyakli mol go‘shtining maksimal narxi esa Yangiyo‘l shahrining “Ixtisoslashtirilgan Yangiyo‘l shahar dehqon bozori”, Urganch shahrining “Urganch markaziy dehqon bozori” va Toshkent shahrining “Farhod dehqon bozori”da kuzatildi (xususiy tadbirkorlar rastalarida 78 000 so‘m). Shu bilan birga, mazkur bozorlarda tashkil etilgan arzonlashtirilgan rastalarda mol go‘shti minimal 50 000 – 60 000 so‘mga sotilmoqda.

Qo‘y go‘shti

55 000 so‘mdan 91 000 so‘mgacha (kg)

Qo‘y go‘shtining minimal (55 000 so‘m, arzonlashtirilgan rastalarda), shuningdek, maksimal (91 000 so‘m, xususiy tadbirkorlar rastalarida) narxi ham kuzatuv natijasiga ko‘ra, Toshkent shahrining “Farhod dehqon bozori” ro‘yxatga olingan.

Kartoshka

3 000 so‘mdan 6 000 so‘mgacha (kg)

Kuzatuv natijalariga ko‘ra, Jizzax shahrining “Jizzax markaziy dehqon bozori” va Navoiy shahrining “Saxovat” bozorida tashkil etilgan arzonlashtirilgan savdo rastalarida sotilayotgan yirik bo‘lmagan kartoshkaning narxi minimal narx sifatida (3 000 so‘m) qayd etilgan.

Shu bilan birga, Toshkent shahrining “Farhod dehqon bozori”da sotuvdagi saralangan kartoshkaning narxi maksimal narx sifatida (6 000 so‘m) qayd etildi. Ushbu bozordagi arzonlashtirilgan rastalarda sotilayotgan kartoshkani minimal 3 500 so‘mdan xarid qilish mumkin.

Piyoz

2 500 so‘mdan 6 000 so‘mgacha (kg)

Piyoz mahsulotining minimal narxi kuzatuv natijasiga ko‘ra, Toshkent shahrining “Eski jo‘va dehqon bozori”da (2 500 so‘m) ro‘yxatga olindi. Maksimal narx sifatida esa Urganch shahrining “Urganch dehqon bozori”da sotuvda bo‘lgan saralangan piyozning narxi kuzatildi (6 000 so‘m). Shuningdek, mazkur bozorda piyozni minimal 3 500 so‘mga ham xarid qilish mumkin.

Sabzi

2 000 so‘mdan 5 500 so‘mgacha (kg)

Sabzi mahsulotining minimal narxi kuzatuv natijasiga ko‘ra, Navoiy shahrining “Saxovat bozori”, Namangan shahrining “Namangan chorsu dehqon universal bozori”, Guliston shahrining “Guliston dehqon bozori”, Urganch shahrining “Urganch markaziy dehqon bozori” va Toshkent shahrining “Mirobod dehqon bozori”da (2 000 so‘m) qayd etilgan.

Shuningdek, mazkur bozorlarda sabzini maksimal 2 800 – 4 000 so‘mga ham xarid qilish mumkin. Sabzi mahsulotining maksimal narxi esa Toshkent shahrining “Farhod dehqon bozori” da 5 500 so‘m darajasida qayd etilgan. Ushbu bozorda sabzining minimal narxi 2 500 so‘mni tashkil etdi.

Tuxum

10 000 so‘mdan 17 000 so‘mgacha (10 dona)

Kuzatuv natijasiga ko‘ra, Samarqand shahrining “Siyob dehqon bozori”, Chirchiq shahrining “Chirchiq dehqon bozori”, Farg‘ona shahrining “Markaziy dehqon bozori”, Toshkent shahrining “Eski jo‘va dehqon bozori” va “Qo‘yliq dehqon bozori”da arzonlashtirilgan tuxum rastalaridagi mayda tuxumning narxi minimal narx sifatida qayd etildi (10 000 so‘m).

Maksimal narxi esa Toshkent shahrining “Farhod dehqon bozori” va “Oloy dehqon bozori”da qayd etilgan (yirik saralangan tuxum 17 000 so‘m). Shuningdek, mazkur bozorlarda 10 dona mayda tuxumning minimal narxi 11 000 – 12 000 so‘mni tashkil etgan.

Guruch

6 000 so‘mdan 27 000 so‘mgacha (kg)

Kuzatuv natijalariga ko‘ra, guruch mahsulotining minimal narxi Nukus shahrining “Nukus dehqon bozori”, Namangan shahrining “Namangan chorsu dehqon universal bozori” (“Nukus-2” va boshqa mahalliy navli guruchlar,6 000 so‘m) qayd etilgan.

Maksimal narx esa Toshkent shahrining “Oloy dehqon bozori”da 27 000 so‘mdan kuzatildi (“Lazer” navli guruch). Shu bilan birga, ushbu bozorda guruchning minimal narxi 8 000 so‘mni tashkil etgan.

O‘simlik yog‘i

16 500 so‘mdan 30 000 so‘mgacha (litr)

O‘simlik yog‘ining kuzatuv natijasiga ko‘ra, minimal narxi Namangan shahrining “Namangan chorsu dehqon universal bozori”da (mahalliy paxta yog‘i 16 500 so‘m) kuzatildi. Shuningdek, mazkur bozordagi xususiy tadbirkorlar rastalarida o‘simlik yog‘ini 20 000 so‘mga ham xarid qilish mumkin.

Maksimal narxi esa Toshkent shahrining “Oloy dehqon bozori” va “Mirobod dehqon bozori”da (kungaboqar yog‘i 30 000 so‘m) kuzatildi. Shuningdek, mazkur bozorlarda o‘simlik yog‘ini minimal 17 000 – 18 000 so‘mga ham xarid qilish mumkin.

Shakar

11 000 so‘mdan 15 000 so‘mgacha (kg)

Shakar mahsulotining kuzatuv natijasiga ko‘ra minimal narxi Navoiy shahrining “Saxovat bozori”da arzonlashtirilgan rastalarda (11 000 so‘m) qayd etildi. Maksimal narxi esa Toshkent shahrining “Farhod dehqon bozori”da (15 000 so‘m) kuzatildi. Shuningdek, mazkur bozorda shakarni minimal 12 000 so‘mga ham xarid qilish mumkin.

Eslatma! Narxlarni ro‘yxatga oluvchi tomonidan kuzatuv o‘tkazilgan kun va vaqtdagi narx-navo qayd etilib, bunda vaqt va joyiga qarab narxlar o‘zgarib turadi. Mazkur ma’lumotlarning shakllanishi jarayonida faqatgina dehqon bozorlari hududidagi oziq-ovqat mahsulotlari narxlari hisobga olingan (supermarket, minimarket, do‘konlardagi narxlar inobatga olinmagan).

Avvalroq bozorlardagi oziq-ovqat mahsulotlarining 30-noyabr holatiga ko‘ra narxlari keltirilgan edi.