Россия президенти Владимир Путин 19 декабрь куни ишчи ташриф билан Минскка бориб, Беларусь президенти Александр Лукашенко билан музокаралар ўтказади. Бу ҳақда Беларусь раҳбари матбуот хизмати хабар бермоқда.
Беларусь-Россия музокаралари Мустақиллик саройида бўлиб ўтади. Учрашув кенг тартибдаги суҳбат билан бошланади, унда давлат раҳбарларидан ташқари, икки мамлакат ҳукуматлари, вазирликлар ва идоралар раҳбарлари қатнашади. Шундан кейин президентлар юзма-юз форматда музокараларни давом эттиради, сўнг баёнот эълон қилиб, журналистлар саволларига жавоб беради.
Давлат раҳбарлари аввалроқ қабул қилинган иттифоқ дастурларининг амалга оширилиши қандай бораётгани, биринчи навбатда, савдо-иқтисодий ҳамкорлик, импорт ўрнини босишга урғу қаратилган қўшма кооперацион лойиҳалар масалалари кўриб чиқилади. Шунингдек, президентлар минтақа ва дунёдаги вазият юзасидан фикр алмашади, энергетика соҳаси, хавфсизлик масалалари ва таҳдидларга жавоб кўрсатиш бўйича қўшма чоралар борасидаги ҳамкорлик ҳақида гаплашади.
Кремль ҳозирча Путиннинг Минскка ташрифи ҳақида хабар бергани йўқ. Россия ва Беларусь раҳбарларининг декабрдаги учрашуви эҳтимоли ҳақида аввалроқ Россия президенти матбуот котиби Дмитрий Песков маълум қилганди.
Лукашенко эса Путин билан учрашмоқчи эканини ноябрь охиридаёқ эълон қилганди. У иқтисодиётдаги муаммолар ва икки томонлама ҳамкорликни тўхтатиб қўяётган бюрократик масалаларни муҳокама қилишини айтганди.
Охирги марта Россия ва Беларусь президентлари 26 сентябрь куни Сочида учрашганди. Улар иқтисодий масалаларни, Иттифоқ давлатини ҳамда «кимё, озиқ-овқат, ўғитлар соҳасидаги» қўшма режаларни муҳокама қилганди.
Путин Минскка бундан олдин 2019 йилда келган, ўшанда у Иккинчи Европа ўйинлари мусобақаларини томоша қилган ва шу жумладан, Лукашенко билан ҳам учрашганди.
Россия ва Беларусь Иттифоқ давлати 2000 йил январидан буён мавжуд бўлиб келмоқда. Иттифоқ иштирокчилари умумий парламент ва конституция, ягона валюта яратишни муҳокама қилган, аммо бундай битимни қабул қилмаган. 2019 йилда Россия ташаббуси билан музокаралар қайта бошланди, 2021 йилда эса томонлар Россия ва Беларуснинг интеграциялашувига қаратилган 28 та иттифоқ дастурларни келишиб олди.
Изоҳ (0)