Toshkentda uy-joy ijarasi narxlarining o‘zgarishi tahlil qilindi. Bu haqda “Daryo”ga Iqtisodiy tadqiqotlar va islohotlar markazi xabar berdi.
Kuzning so‘nggi oyida poytaxtda ijara narxlarining pasayishi qayd etildi. Oktabr oyiga nisbatan noyabr oyida Toshkent shahrida ijaraga beriladigan uy-joy narxi 5,8 foizga kamaydi.
Shu bilan birga, yil boshidan beri poytaxtda o‘rtacha ijara narxi 35 foizdan oshdi va 1 kvadrat metr uchun deyarli 10 dollarni tashkil etdi.
1 kvadrat metr uchun eng yuqori ijara narxi Shayxontohur (13,2 dollar), Mirobod (12,3 dollar) va Yakkasaroy (12,2 dollar) tumanlarida qayd etildi.
Nisbatan arzon narxlar Uchtepa (8,1 dollar), Sergeli (7,2 dollar) va Bektemir (6 dollar) tumanlarida qayd etildi.
Shuningdek, 2022-yil noyabr oyi uchun Toshkent shahrida uy-joy narxlari o‘zgarishi tahlil qilingan.
2022-yilning noyabr oyida Toshkent shahri bo‘yicha uy savdosi o‘tgan yilning mos davriga nisbatan o‘rtacha 8 foizga (7 814 tadan 8 408 taga) oshgan.
Mazkur davrda 1 kvadrat metr uchun narxlar o‘rtacha 27 foizga oshgan, ya’ni ushbu ko‘rsatkich 2021-yil noyabrda 849 dollar bo‘lgan bo‘lsa, 2022-yil noyabrda 1 078 dollarga yetdi.
Toshkent shahrining ayrim hududlarida 1 kv metr uchun uy narxlari o‘rtacha ko‘rsatkichdan (1 078 dollar) sezilarli darajada yuqori hisoblanadi. Xususan:
- Mirobodda — 1 285 dollar (+20 foiz);
- Yakkasaroyda — 1 178 dollar (+ 9 foiz);
- Shayxontohurda — 1 144 dollar (+6 foiz);
- Mirzo Ulug‘bekda — 1 137 dollar (+6 foiz);
- Yunusobodda — 1 117 dollar (+ 4 foiz).
Ma’lumot uchun: 2022-yil 9 oyida Toshkent shahri bo‘yicha o‘rtacha ish haqi 5,9 million so‘mga yetib, 2021-yilning mos davriga nisbatan 32,5 foizga o‘sgan.
Izoh (0)