Tadbirkor Ilon Mask tomonidan sotib olinganidan so‘ng, Twitter xarajatlarni kamaytirish uchun ofis ijarasini to‘lashni to‘xtatdi. Bu haqda The New York Times kompaniyadagi manbalariga tayanib xabar berdi.
Ma’lumotlarga ko‘ra, Twitter’ning San-Fransiskodagi (Kaliforniya shtati) bosh ofisi, shuningdek, kompaniyaning boshqa mamlakatlardagi vakolatxonalari joylashgan binolar uchun ijara haqi to‘lash to‘xtatilgan.
Shuningdek, kompaniya avvalgi rahbariyat tomonidan foydalanilgan xususiy aviatashuvchilar xizmatlari uchun haq to‘lashni to‘xtatgan.
Bundan tashqari, kompaniya ishdan bo‘shatilgan xodimlarga ishdan bo‘shatilish nafaqasini berishni ham to‘xtatmoqchi.
Manbalarga ko‘ra, bunday qat’iy choralar kompaniya xarajatlarini kamaytirishga qaratilgan.
Shu munosabat bilan Twitter’da sudga berilishi kutilmoqda, bu fonda Mask o‘zining advokatlar jamoasini kuchaytirmoqda.
Ilon Mask Twitter’ni sotib olish bo‘yicha kelishuvni 27-oktabr kuni yakunlab, kompaniya uchun 44 milliard dollar to‘lagan.
Shundan so‘ng tadbirkor ijtimoiy tarmoq xodimlarining yarmiga yaqinini ishdan bo‘shatdi, qolganlarni esa yuqori intensivlik bilan ishlash kerakligi haqida ogohlantirdi.
OAV xabarlariga ko‘ra, ushbu voqealar fonida platforma faoliyatini saqlab qolish uchun muhim bo‘lgan ko‘plab xodimlar Twitter’ni tark etgan.
Avvalroq Ilon Mask dunyoning eng boy odamlari reytingida yetakchilikni boy bergani haqida xabar berilgandi.
Izoh (0)