O‘zbekistonda ko‘chmas mulk bozoridagi talab o‘zgarishlari tahlil qilindi. Bu haqda “Daryo”ga Iqtisodiy tadqiqotlar va islohotlar markazi xabar berdi.
Noyabr oyida O‘zbekiston ko‘chmas mulk bozori oktabr oyidagi bir oz pasayishdan keyin xaridorlarni qayta jalb qildi. Shunday qilib, bir oy ichida mamlakatda ko‘chmas mulk oldi-sotdi shartnomalari soni o‘tgan oyga nisbatan 7,8 foizga oshdi.
Uy-joy savdosining eng yuqori o‘sish sur’atlari Xorazm (38 foiz), Navoiy (24 foiz) viloyatlarida va Qoraqalpog‘iston Respublikasida (23 foiz) qayd etildi.
Yil boshidan buyon o‘tgan yilning shu davriga nisbatan uy-joy savdosining o‘sishi 9 foizni tashkil etdi. Shu bilan birga, o‘tgan yilning noyabriga nisbatan ko‘chmas mulk bozoridagi shartnomalar soni 8,1 foizga oshdi.
Ko‘chmas mulk bo‘yicha rasmiylashtirilgan oldi-sotdi shartnomalari sonining o‘zgarishi:
Mutaxassislarning ta’kidlashicha, O‘zbekistonda 2022-yil 1-noyabrda boshlangan ipoteka kreditlaridan foydalanishda aholiga qo‘shimcha qulayliklar yaratish bo‘yicha kengaytirilgan dastur ko‘chmas mulk bozoridagi faollik va talabni rag‘batlantirmoqda.
Xususan, tayyor holda topshirish shartisiz qurilgan uy-joylar uchun ipoteka kreditlarini ajratishga ruxsat berildi.
Uy-joylar uchun dastlabki badalning va ipoteka krediti bo‘yicha foizlarning bir qismini subsidiya olish orqali qoplash mumkin.
Bundan tashqari, 2021-yilda ipoteka kreditlarini ajratishning maqsadli parametrlari doirasida berilgan subsidiyalarni ajratish to‘g‘risidagi xabarnomalarning amal qilish muddati yil oxirigacha uzaytirildi.
Avvalroq O‘zbekistonda eng ko‘p ipoteka krediti ajratayotgan banklar ro‘yxati e’lon qilingani haqida xabar berilgandi.
Izoh (0)