IT Park turli tanlovlarda g‘olib bo‘lgan robototexnika mentori Niyetulla Abdullayevning muvaffaqiyat hikoyasini taqdim etdi.
Agar inson zo‘r IT-mutaxassis bo‘lishni xohlasa, hatto qo‘rquv va shubhalar ham uni to‘xtata olmaydi. Buni Nukus tumanidagi IT Markazi menejeri Niyetulla Abdullayev o‘z misolida isbotladi.
Niyetulla 24 yoshda. Toshkent axborot texnologiyalari universiteti Nukus filialining “Kompyuter injiniringi” fakultetini IT-servis yo‘nalishini tamomlagan.
Hikoya qahramoni tan olganidek, u bolaligidan texnika va robototexnikaga ishtiyoqi bor edi.
Bolaligimdan robototexnikaga mehr qo‘ygan bo‘lsam-da, IT sohasiga qiziqish va ushbu yo‘nalishni o‘rganish imkoniyati 22 yoshimdagina paydo bo‘lgan. Men IT sohasi haqida juda noaniq tasavvurga ega edim.
Nazariya – bir narsa, lekin amalda nimalar sodir bo‘lishini tasavvur qilish qiyin. Aytishim mumkinki, meni hali nimalar kutayotganini to‘liq tushunmay turib, IT’ga butunlay sho‘ng‘idim.
Albatta, dastlab shubhalar bor edi, chunki menda savdo sohasida barqaror ishim bor edi. Ammo men dasturlash tillarini hamda umuman IT yo‘nalishini o‘rganishni boshladim va nimani yoqtirganimni angladim”, — deydi Niyetulla.Darhaqiqat, barcha umidlar oqlandi: ishning tez sur’ati, ko‘plab tadbirlar va doimiy rivojlanish, jiddiy loyihalar, yoqimli muhit — bularning barchasini u IT sohasida topdi.
2021-yildan boshlab Niyetulla rasmiy ravishda mobil robototexnika bo‘yicha mentor sifatida faoliyatini boshladi.
“Qisqa muddatli o‘qituvchilik faoliyatim davomida kurslarimni ikki guruh tamomladi. Men bilim berishni juda yaxshi ko‘rishimni tan olaman. Bolalar ajoyib fantaziyaga ega va ular bilan ishlashda men shunchalik energiya, ijobiylik va ilhom olamanki, hatto tog‘larni siljitishga tayyorman!, — deydi u faoliyati haqida.
Aytgancha, u nafaqat yosh daholardan ilhom oladi. Niyetullaning aytishicha, qiyinchiliklar — uning ishidagi eng katta motivatorlardan biri.
Mening sohamda real datchiklar bilan ishlash juda muhim, ammo bunday imkoniyat deyarli yo‘q. O‘ylaymanki, umidsizlik meni katta yutuqlarga va yangi layfxaklarga undadi. Bu chiniqtiradi va agar inson haqiqatan ham xohlasa, hamma narsani qila olishini his qiladi, — deb tushintiradi u.
Niyetullaning o‘zi hamma narsani qila olishiga shubha yo‘q. Yosh mutaxassisning orqasida ulkan g‘alabalar ro‘yxati mavjud. 2019-yilda u turli mamlakatlar vakillari ishtirok etgan “Union X” xalqaro konferensiyasining delegati edi.
Konferensiya yosh avlod uchun global va ijtimoiy-iqtisodiy masalalar bilan shug‘ullanuvchi eng yirik va nufuzli tashkilotlarni modellashtirish platformasi bo‘lib xizmat qiladi.
Biz konferensiyalarni o‘yin formatida o‘tkazdik, bu bizga boshqa ishtirokchilar bilan oson do‘stlashishga va umumiy til topishga yordam berdi. Mazkur konferensiya 9 ta xalqaro tashkilot va O‘zbekiston Respublikasi Oliy Majlisi Qonunchilik palatasining simulyatsiyasi hisoblanadi.
Ushbu konferensiyaning asosiy maqsadi — yoshlarni xalqaro huquq tamoyillari bilan yaqindan tanishtirish, ularning huquqiy ongi va salohiyatini yuksaltirish, mamlakatimiz ravnaqi yo‘lida munosib hissa qo‘shishga loyiq avlodni tarbiyalash borasidagi sa’y-harakatlarni rag‘batlantirishdan iborat, — deydi mutaxassis.
2021-yilda Niyetulla “O‘zbekiston uchun 100 g‘oya” tanlovining respublika final bosqichida ishtirok etib, O‘zbekiston Respublikasi Yoshlar ishlari Agentligidan 10 million so‘m yutib oldi.
2022-yilda u “Texnologiya va iqlim o‘zgarishi bo‘yicha ayollar uchun biznes-akkseleratsiya dasturi”da g‘olib bo‘lgan jamoaning a’zosi edi.
Bundan tashqari, Niyetulla Nukusda yoshlar uchun o‘tkazilgan “yashil” startaplar tanlovida qatnashib, g‘olib deb topildi va 2 000 dollar yutib oldi.
Hozirgi kunda Niyetulla oyiga 700 dollardan boshlab maosh oladi va o‘z misolida muvaffaqiyat tinimsiz mehnat qiladiganlarga kelishini isbotlamoqda.
Izoh (0)