2022-yilda jahon mobil o‘yinlar bozori 14 yil ichida birinchi marta 6,4 foizga pasayib, 92,2 milliard dollarni tashkil etadi. Bu haqda Newzoo tahliliy kompaniyasi prognoziga asoslanib, Financial Times xabar bermoqda.
Ma’lumotlarga ko‘ra, mobil o‘yinlar ishlab chiquvchi kompaniyalar daromadining pasayishi COVID-19 pandemiyasi davrida talabning keskin o‘sganidan so‘ng, soha sanoatidagi umumiy sekinlashish fonida kutilmoqda.
2021-yilda mobil o‘yinlar bozori 2020-yilgi rekord 25,6 foizdan keyin 7,3 foizga o‘sgandi.
Keng miqyosdagi lokdaunlar tufayli yuzaga kelgan virtual o‘yin-kulgiga qiziqish cheklovlar olib tashlanganidan keyin keskin kamaydi.
Manbalarning ta’kidlashicha, smartfonlar uchun o‘yin ishlab chiqaruvchi yirik kompaniyalarning ilova ichidagi xaridlardan tushgan daromadi joriy yilda 15-20 foizga kamaygan.
Mutaxassislarning ta’kidlashicha, o‘yin sanoatidagi vaziyat nafaqat bunday kontentni ishlab chiqishga ixtisoslashgan firmalarni, balki choraklik natijalari investorlar kutganidan ham past bo‘lgan Alphabet va Apple kabi internet gigantlarini ham qamrab olgan.
2008-yildan buyon barqaror o‘sish ko‘rsatgan sanoatning pasayishiga qaramay, tahlilchilar vaziyatga optimistik yondoshmoqda.
Ular ko‘plab bozorlarda hali ham smartfonlar va buning natijasida mobil ilovalar sotuvining ko‘payishi ehtimoli mavjudligini ta’kidlaydi. Biroq tiklanish jarayoni bir yildan ko‘proq vaqt olishi mumkinligini tan olishadi.
Mobil o‘yinlar savdosi mintaqalar bo‘ylab keng farq qiladi. Oktabr oyida Xitoyda yillik daromadning kamayishi 27,27 foizni tashkil etgan bo‘lsa, Rossiyada joriy yilda 25 foizga o‘sib, 1,2 milliard dollargacha o‘sishi prognoz qilingan.
Izoh (0)