2022 йилда жаҳон мобил ўйинлар бозори 14 йил ичида биринчи марта 6,4 фоизга пасайиб, 92,2 миллиард долларни ташкил этади. Бу ҳақда Newzoo таҳлилий компанияси прогнозига асосланиб, Financial Times хабар бермоқда.
Маълумотларга кўра, мобил ўйинлар ишлаб чиқувчи компаниялар даромадининг пасайиши COVID-19 пандемияси даврида талабнинг кескин ўсганидан сўнг, соҳа саноатидаги умумий секинлашиш фонида кутилмоқда.
2021 йилда мобил ўйинлар бозори 2020 йилги рекорд 25,6 фоиздан кейин 7,3 фоизга ўсганди.
Кенг миқёсдаги локдаунлар туфайли юзага келган виртуал ўйин-кулгига қизиқиш чекловлар олиб ташланганидан кейин кескин камайди.
Манбаларнинг таъкидлашича, смартфонлар учун ўйин ишлаб чиқарувчи йирик компанияларнинг илова ичидаги харидлардан тушган даромади жорий йилда 15-20 фоизга камайган.
Мутахассисларнинг таъкидлашича, ўйин саноатидаги вазият нафақат бундай контентни ишлаб чиқишга ихтисослашган фирмаларни, балки чораклик натижалари инвесторлар кутганидан ҳам паст бўлган Alphabet ва Apple каби интернет гигантларини ҳам қамраб олган.
2008 йилдан буён барқарор ўсиш кўрсатган саноатнинг пасайишига қарамай, таҳлилчилар вазиятга оптимистик ёндошмоқда.
Улар кўплаб бозорларда ҳали ҳам смартфонлар ва бунинг натижасида мобил иловалар сотувининг кўпайиши эҳтимоли мавжудлигини таъкидлайди. Бироқ тикланиш жараёни бир йилдан кўпроқ вақт олиши мумкинлигини тан олишади.
Мобил ўйинлар савдоси минтақалар бўйлаб кенг фарқ қилади. Октябрь ойида Хитойда йиллик даромаднинг камайиши 27,27 фоизни ташкил этган бўлса, Россияда жорий йилда 25 фоизга ўсиб, 1,2 миллиард долларгача ўсиши прогноз қилинган.
Изоҳ (0)