Belarus Shanxay Hamkorlik Tashkilotiga (SHHT) a’zo bo‘lish jarayonini tezlashtiradi. Bu haqda mamlakat bosh vaziri Roman Golovchenkoga tayanib, Sputnik xabar berdi.
Siyosatchi Belarusning yangi tashqi ishlar vaziri Sergey Aleynikni vazirlik xodimlariga tanishtirayotganda SHHTga integratsiyalashuv jarayonini “maksimal faollashtirish” zarurligini aytdi. Golovchenko Rossiya va MDH, YII va SHHT kabi ittifoqlar bilan integratsiyani “alohida diqqat markazida” saqlashga chaqirgan.
“Ishtirokimiz mavjud bo‘lgan tashkilotlarda manfaatlarimizni himoya qiling. Shuningdek, SHHTga qo‘shilish jarayonini maksimal darajada faollashtiring”, — degan Golovchenko.
Bosh vazirning so‘zlariga ko‘ra, Belarus tashqi ishlar vazirligining kollektiv G‘arb bilan shug‘ullanuvchi bo‘linmalari soni qisqarishi, MDH davlatlari va Xitoydagi elchixonalarniki esa kuchayishi zarur.
Ma’lumot o‘rnida, 13-dekabr kuni Belarus prezidenti Aleksandr Lukashenko yangi tashqi ishlar vaziri etib Sergey Aleynikni tayinladi. Bungacha mazkur lavozimda Vladimir Makey faoliyat olib borgan. Biroq siyosatchi 26-noyabr kuni to‘satdan vafot etgandi. OAV uning o‘limiga yuruk xuruji sabab bo‘lganini aytgan, biroq ayrim rasmiyalr unga suiqasd bo‘lganini ta’kidlamoqda.
Izoh (0)